David and Goliath a dan a dang ang Noah leh Exodus film-te nen a inang dawn lo

Noah film kha a hit khawp mai a, mahse mi tam tak chuan Bible zirtirna nen a inang lo, Bible ziak dan nen a danglam tiin an sawisel nasa hle. Exodus: Gods and Kings pawh chutiang bawk chu an sawiselna a ni. Mahse, Biblical film thar rawn chhuak tur, David and Goliath erawh chu a dan a dang dawn.

David and Go­liath film director Tim Chey chuan a film chu a hmaa Bible behchhan film-te nen a inang dawn lo tih a sawi a, "A hmasa berah chuan kei hi director chauh ka ni lo a, evangelist ka ni tel a ni," a ti a, hei hian thu tam tak a sawi. Chanchin Ṭha puandarh duhna rilru nen he film hi a siam a, Bible thu ang thei tur berin a buaipui tih a kawk thei. "Zep lohah chuan Bible-a a inziak loh dan emaw, Lalpa ropuina dâl thei tur film chu ka siam hauh lo ang," tiin a tlip zui. A chiang tawk viau a ni.

Chey chuan, "A hma chuan Pathian awm ka ring lo ṭhin a, Manila-a ka thlenna hotel-a Gideon-hoin Bible an dah ka chhiar aṭangin Krista ka chhar chhuak ta a ni. David and Goliath film hi kei leh ka thawhpuite chuan kum 11 ṭhelh kan buaipui tawh a ni," a ti.

A film siam hi a sawi nasa hle a, a entute rilru a khawih ngei a ring a, mi tam tak mittui a tlaktir ngei a ring. "He film hmang hian mite tuilairapa an awm ṭhin chu tihtawp ka tum a, Pathian tana ding thei ngei tura siam ka tum a ni. Kan hringnuna sual lianpui hneh thei turin he film hian a entute a puiha a tihchak ngei ka beisei. Cinema hall an chhuahsan hnuah, 'Lalpa tan ka ding ve tawh ang' ti chunga an chhuahsan a, sual hnenah chuan, 'Min bei turin ngunhnam, leh fei chi tin nen i rawn thawk chhuak a, kei erawh chu Lalpa Engkimtitheia hmingin nangmah bei turin ka rawn thawkchhuak a ni,' an tih theih ngei nan he film hi ka siam a ni," a ti.

David and Goliath film hi Africa hmar lamah an chang ber a, April 3 hian US-ah chuan an tichhuak ang.