Fashion Fiesta

Pathian khawngaihna zarah kum hnih dawn lai mai chu incheina chungchang ka lo ziak ve ta a, ka lo ngaihtuah ngai lem loh leh pawimawh lutuk tura ka lo ngaih loh chu hre chhuak thut ni awm ang hrimin tun ṭum chu rawn thailan ṭul tlatin ka hria. Kan ṭhalai lam tan chuan thil thar lutuk tur pawh a awm lem lo, amaherawhchu mahni tui lohna zawng te anih phei chuan thil hi a hriat loh theih khawp a. Vawi tam tak incheina chungchangah chumi khami chu bun la, tiin pheikhawk chungchang ka sawi chamchi a. Pheikhawk chi khat chiah awm hek lo le, hming hrang hrang a nei bawk si nen, a ṭhen tan phei hi chuan eng hi nge platform pheikhawk chu, stilettos chu eng nge le?... hriatthiam a harin, hming chi hrang hrang a tam ropui bawk si, zir chiang dawn teh ang.

A hming hrim hrim hi a nalh a, a mawi hmel nghal tawp, mimal tak pawha ka ngainat, stilettos-ho hi chu kan hriatthiam dan tur chuan hmeichhe hoin kan bun tlanglawn tak mai pheikhawk sang, a heel, a ke sin sang zet, mipa ṭawngkam taka sexy tak mai hi stilettos an tihho chu a ni. Inchei nikhuaa kan bun tlanglawn ber a ni chho ta a ni.

Platform, hmanlai greek miten hausak entirnana an bun ṭhin, tunlaia incheina pheikhawk tlanglawn ber mai leh bun nuam tak, kechhah tep tupho hi platform kan tih tak ho chu a ni. Slingbacks ho ve thung hi chu pheikhawk sang, a heel hnung lama inthlung ang chi ho sawi nana hman a ni.

Sandals, heng chi hohi chu kan hre vekin a rinawm. A hmei a pa ina kan bun theih, pheikhawk zinga simple ber mai leh ke lang tam thei ber tura siam, bun nuam tak a ni tlangpui. Moccassin, America rama cheng hmasa bertena an uarchhuah savun nem tak aṭanga siam, heel nei lo leh pawnlam chhuahvahnaa bun atana siam, a hmei apa bun atana siam, tunlaiah chuan ṭhalaite duhzawng mila ziarang hrang hrang neia siam a ni ta.

Slip-on/Loafers, hengho hi chu a nalh ngawr ngawr ai maha bun nuam ngai pawimawh hote ngainat rawn, a thlunna awm lo, Mizo ṭawng taka thawlhthawt kan tih ang chiho hi a ni e. A hmei apa tana duan tho a ni e.

Ballerinas, heng chiho hi chu ṭhalaite leh tleirawlte ngainat rawn, tlema nu valai lam thleng pawhina kan bun nasat, pheikhawk ke artui sang lo ,bun nuam tak design simple, a pum tawp a ni tlangpui.

Brogues, oxford, wingtips tih tein mi tam zawk chuan kan hmelhriat ngei ang. A hmei apain kan uar hle, a nalhin a tunlai, a changkang phian bawk. Wingtips an tihna chhan pawh a chung aṭanga ena W shape anga ṭhui thlurna a lang ṭhin vang a ni a. Ziarang W shape ang a nei tlangpui. Scotland ram aṭanga an chin chhuah, a chung vela kua te reuh te te, design ziarang an siam chu incheina khawvela mite ngainat ber a ni ta. Tunlaiah hmeichhe lam bun theih turin, a heel tlema sang inches 2/3 lek tea siam a ni ta a. Te lam deuh tan leh class kal, office kal ilo tan a ṭha hle.

Brothel creepers, suede puana siam, a hnuai chhah deuh tep tup. Indopui pahnihna zawh lama sipai hoin an bun aṭanga rawn lar ṭan, tunlai incheina dangdai tak pakhat, gothic incheina te nena kalkawp tak pakhat a ni.

Mary Jane, hmei­chhe school naupang form phei­khawk, pheikhawk pum deuh ep, a chunga bahna awm ang chi hi, school naupang cauh ni lo, mi nawlpui bun atan kan designer-ten rawng chi hrang leh ze danglam deuh hmangin an rawn siamchhuak a. A heel sang deuh hlek, a hma pum ang chiho hi maryjane pumps tia sawi te pawh awm.

Pumps kan hre vekin ka hria, tunlai kan ṭhalaite ngainat leh uar tak, a pum hmawr zum, tlema zum lo deuh te pawh pumps an tih chang a awm tho, a hmalam flat, a hma chhah lo ang chi ho sawina a ni e.

Espadrilles, wedge kan tih ang chi ho, amaherawhchu a heel hnang emaw buara a tah emaw phiar hmanga design awm ang chi sawina. A nuin nipuia bun atan kawrfual ni hnilh hnelh nen a mawi bik.

Wedge, heihi chu a hming kan hre fo tawh ang, ke artui nei lo, a hnuai chhah lai sang deuh leh hniam deuh te pawh a awm ṭhin, a heel a hrana awm lo ang chiho sawina a ni e.

Peep-toes, a tam zawk chuan a hming hrim hrim pawh hi kan hmelhriat vek tawhin a rinawm. Pheikhawk sang hmawr/hma kua sawi nana hman a ni.

Heng bakah hian sawi tur tam tak a la awm. Boots, sneakers ho erawh hi chu kan hmelhriat vek tho a, sawi nawn lo mai ila. Mi nawlpuiina kan hmelhriat theih tur kan thai lang a ni e.

Tluangpuii hmar
instructress
vakiria institute of fashion technology