Zonet Arkaiden Zan: Lallianmawia Pachuau pualin hun hmang dawn

Zanin hian Zonet Arkaiden Zan episode 3 hman a ni leh dawn a, hranghlui zaithiam, Zoram rimawi khawvela a hming dai tawh lo tur, zaithiam leh hlaphuah thiam Lallianmawia Pachuau pual a ni ang.

Woodland Hills, Zonuam-a hun hman hi Zonuni Pachuau-in a kaihruai dawn a, Zonet Zawlbuk, Zonet HD leh Empai Apps-ah live a pek chhuah a ni leh ang. Tunlai zaithiam lar - Guru Gee, Zodini Sailo, Mathlenga, HT Lalthanzami, Kimkima, T. Vanlalhmangaihin, Youngfella leh Ticos-a ten Lallianmawia Pachuau hlate an sa dawn a ni. Lallianmawia hringnun lamtluang video display a ni ang a, a chhungte lam aṭangin a tupa, Eddie Zosangliana Colney in thu a sawi dawn bawk a ni. Zanina Lallianmawia Pachuau hla an sak turte hi 'Thliah loh tleitir', 'Ka lunglen i tan lawmna', 'Mampui ngaihthiam hram rawh', 'Hmangaih LM', 'Nghilh bik suh Rinpui', 'Min hnem rawh', 'Pialral rammawi', 'Ṭhachungchuangi', 'Zanlai thlifim', 'Dawt leng an sel', 'Nunhlui ngaiin', 'Keimah vang', 'Ka thai mampui', 'Lalte ' leh 'Sese thu di' te an ni.

Lallianmawia Pachuau hi Rokunga Ieh Siamliani-te fa niin kum 1963, October 2-ah a piang a, pianpui unau pakua a nei. Kum 1984-ah Biakthantluangi nen inneiin fapa pahnih an nei a ni. Kum 1987, May 18 khan a boral a ni.

Zai leh rimawi lamah a tui hma hle a, kum 8 mi lek a nih aṭangin mi hmuh leh hriatah a zai ṭan tawh. A tleirawl chhoh hnuah pawh YMA Branch aiawhin General Conference-ahte a zai a, ama hla phuah ngei, style danglam tak maia a sa chhuak chuan Zoram khawvel a deng chhuak a ni. Kum 1983-a radio-a hla a khung, 'Pass lawmpuina', 'Nem ten ka chawi nang che', 'Dawn thiam a har ngei e ṭhiana', 'Di fuh te' leh 'Ka ngai thiam lo' tihte chuan hla thlan hun an luah hneh hle.

A hlate mipuiin an hlut hle tih a hriat hnuah cassette siam a rilruk ta a, Thangluaia Aizawl Radio House neitu chuan 'Nem ten ka chawi nang che' tih album chu buaipui sakin an siam ta a ni. Hemi hnu hian Otto Recording neitupa, Valtea nen thawk dun lehin, 'Zanlai thlifim', 'Di Fuh te' leh 'Duatlai Ate' tih album an siam leh a ni. A album-te hi Mizoram leh ram pawnah hralh a tla hle. Lengzem hla saa a lar lai tak hian Pathian lama tuihalna neiin, kum 1986, November 23 zanah Rom 12 aṭangin piantharna a chang a, kum 1987 KṬP General Conference-ah Pathian fakna hla sain hun a hmang a, a fakna hla phuah, 'Aman engkimah min hria' tih chu vawiin thlengin hla sak hlawh tak a la ni zui reng. Fakna hla album siam a rilruk mek laiin Pathianin a hnenah a hruai ta a ni.