Amazon-in UK film studio a lei

Amazon Prime Video chuan UK film studio, kum 70 chuang zet film hrang hrang lo siam tawh, Berkshire-a Bray Film Studios chu a lei fel ta.

US-based company hian kum 2022 aṭang khan he studio-ah hian The Lord of the Rings: The Rings of Power pawh a lo siam tawh a, tunah chuan a neitu a ni ta a ni. Bray Film Studios hi central London aṭanga km 42 vel chauha hla, Thames lui kama awm a ni. A building hi 18th century-a sak a ni. A zau zawng hi square feet 53,600 niin, sound stage panga a awm a, workshop hi square feet 77,000-a zau awm bawkin, office leh parking space zau tak a awm bawk. Kum 1951 aṭang khan Hammer Films chu he hmunah hian insawnin, fantasy leh horror film 100 chuang an siam hman. Film an siam zingah hian khawvel huapa hit, 'The Mummy', 'The Curse of Frankenstein' leh 'Dracula' te pawh an tel. Academy Award winning sci-fi thriller, 'Alien' pawh kum 1978-a he studio-a an siam hi a ni.