Vanglaini Bihchianna: Entrepreneur Huang ZOPA PEREK
Mizo te mamawh em em, perek siam chhuaktu 'Zopa Perek' chu Vanglaini chuan a bihchiang a, anni hi Mizorama perek siam chhuaktu hmasa nia hriat an ni. 'Zopa Perek' hi R. Lalchhuansanga, Bawngkawn Veng in a din niin, an industry hi Falkland Veng, Aizawlah a awm a ni.
Bul ṭan dan:
'Zopa Perek' neitu, R. Lalchhuansanga hi a hmain buhfai phur leh hardware dawr hmanga eizawng ṭhin a ni. An hardware dawr aṭang hian perek chu mitin mamawh a ni tih an hriatchian tak avang leh, vai ho hnen aṭanga an lak ṭhinah laklawh changte a lo awm avangin Mizoram ngeiah a siam ve theih ang tiin ngaihtuahna a nei ta tih a sawi.
Perek siam dan chu internet lamahte zirchiangin, hma an la chho a. "Raw material (perek thir) hi a lo inang lo nasa khawp mai. A hnaivaiah lak turte pawh awm nual mah se, Mizo thing (wood) hman hi a ṭhat em avangin thir (iron) ṭha deuh kher kan zawng a, kan biak kual viau hnuah kan nupain Gujarat & Durgapur (Iron/steel hmunpui)-ah kan zuk zin ve ta tawp mai a. A hmunah ngei zuk kalin duhte kan zuk thlang a ni," tiin bul an ṭan dan a sawi. Bul ṭanna tur hian sum a hautak avangin an buhfai phur motor (truck) leh hardware dawr an tiral a, an private motor thlenga hralhin loan an la tel bawk. Nikum November thla aṭanga buaipuiin, June 2,2024-ah a khawl an bun fel a, June 9 aṭangin perek siam hna hi an ṭan a ni.
Thawktu :
'Zopa Perek' ah hian a neitu nen mi paliin perek siam hna hi an thawk mek. An mi chhawrte hi Mizo vek an ni a, phai aṭangin trainer in a awmchilh bawk. An mi chhawrte hi training an pe phawt a, an thiam chhoh dan azirin hlawh pawh an inpe dawn a ni. Training hi thla hnih/khat an nei ṭhin.
Sem/zawrh chhuah dan :
Tunah hian perek hi inch 1 , inch 1 & a chanve, inch 1 & a chanve (a zén) , inch 2, inch 2 (a zén), inch 2 & a chanve leh, inch 3-te an siam a, a ṭul angin a aia lian leh sei pawh a siam zel theih. Hardware dawr leh perek zuarte hnenah an pe chhuak ṭan tawh. "Phai lam rate aia tlâwm hreta pek chhuah kan tum a, kan pe chhuak mek zel bawk," tiin Zopa Perek neitu, Lalchhuansanga chuan Vanglaini a hrilh. Anmahni dawrtute feedback pawh a ṭha viau a, an lawm hle tih a sawi
Harsatna :
Bul an ṭan dawn aṭangin a hmun tur zawn, loan buaipui leh thil dang dangah harsatna pawh an tawk nasa a, "Mahse, harsatna tawh loh hi chuan eng kawng mah hi a sut tlang theih loh tih kan hria. Pathian zarah mi ṭha kan tawng a, beidawn tâwpahte kan ti ve hram hram thei zel. La hlawhtling viau rih lo mah ila, harsatna kan tawh ve hrang hrangte hian Pathian zarah hlawhtlin ni hmel min la hmuhtir ve ngei kan beisei," tiin a sawi.
Hmachhawp :
Tuna perek an siam theih ho hi chatlak loa pek chhuah reng theih nan theihtawp chhuaha ṭan lâk a, customer-te tana innghahna tlak ni turin theihtawp chhuah zel an tum.
Entrepreneurship chungchang:
"Kan ramah intodelh tak tak a la har rih êm a; kan khawl te, raw material-te pawh vai ram aṭanga lak vek a la ni. Kan raw material mamawh angte Mizoramah siam chhuak thei awm se, Mizorama mi ngei hman theih a châkawm tak zet.
Kut hnathawh kan uar chho zel a; sorkar hna hmuhna atana lehkha zir ṭhin kha tunah chuan mahni kutkawiha dinchhuah nana zir pawh kan tam ta khawp mai. Zirlai ni chunga sorkar hna ngaihtuah miah lote pawh kan pung tual tual ta. Entrepreneurship hi Mizote thinlungah a lian hle tawh tih a hriat. Chu ai maha ka lawmna chu intodelh kan duhna leh kan tumna hi a fakawm ka ti a, engtik ni-ah emaw chuan Mizoramah hian motor (danin a phal ngei) kan la siam chhuak ngei ngei ang tih hi ka lo dream ve ṭhin."
R. Lalchhuansanga chuan, Mizorama thil siamchhuahah, Mizo leh Mizo induhsakna a awm thar zel chu lawmawm a tih thu a sawi. Hemi rual hian a hlawk deuh a, a man tihto emaw tihtlem emaw nghal a ni deuh zel mai ṭhin chu pawi a tih thu sawiin, hei hi an inkiansan chhan pakhat niin a ngai. Hlawk nghal thur thur tum chu hnam dang ka la tluk lohna pakhat a ni tiin, 'Ei tam i duh chuan ei tlem rawh' tih thufing ang khan rilru siam thiam a pawimawh a ni, a ti.
"Zopa Perek hi Pathian zarah i tan kan awm chho zel ang a, min lo dawr a, min lo support zel turin ka sâwm che u a ni"
ZOPA PEREK Ph - 9612319927