Samsung aiin Micromax

Apple dinhmun tiderthawng khawpin Samsung an lian chak a, tunah chuan Samsung tana ven ngai ta chu Micromax hi a ni. Kum 2014 last quarter-ah khan Samsung kutchhuak aiin, phone lamah chuan Micromax-in an hralh hnem tawh zawk.

Research firm pakhat, Canalys-in an tarlan danin, October - December 2014 chhung khan smartphone hralh chhuah zinga zaa 22 chu Micromax kutchhuak a ni a, zaa 20 chu Samsung a ni. Zirchiangtute hian Micromax hian an kutchhuakte thuamṭhat lamah hma an la chak a, a bikin tualchhung ṭawng a tam thei ang an zeh tel ṭhin avangin an hralh chak niin an sawi.

Cheng 6,000 hnuai lam bikah Micromax kutchhuak hi an hralh aṭanga zaa 23 a nih laiin, Rs. 6,000 aṭanga 12,000 inkarah chuan Micromax-in an hralh nasa a, smartphone hralh chhuah zaa 41 zet a ni. Heng hralh chhuah tarlan zawng zawng hi India bik a ni. Hei hian a lantir chu Indian smartphone market-ah mipui tam ber lei phak tur, man tlawm si, ṭha si Micromax hian an siam chhuak nasa tihna a ni.

Lava pawhin hma an sawn viau a, Lava hian battery ṭha deuha siam chhuah an ching thar a, hei hian an kutchhuak hralh a tipung viau bawk. India ram ang, power supply duh khawp lohnaah chuan battery ṭha hian kawngro a su viau a ni.