Beck leh Sam Smith Grammy-ah A langsar ber ber an ni

Grammy Awards chu keini tana nimin zing khan Los Angeles-a Staples Centre-ah sem a ni ta a, a langsar ber ber pahnih chu Sam Smith leh Beck an ni.

Best Album an puang dawn a, zaithiam lar leh hit tak tak, an hla zawng zawng pawh khawvelin a sak rualpui ṭhup ṭhup theih eng emaw zat an awm a, chutihlai chuan beisei loh ber Beck chuan 'Morning Phase' album hmangin a rawn la daih! He category-ah hian Beyonce Knowles te, Sam Smith te, Ed Sheeran te an awm a, Beck hi bukin a awm a, a tling ta. Hei bakah hian Beck lanna langsar chu Best Rock Album a ni.
Sam Smith tan chuan nikum leh kumin hi kum chhinchhiah tlak a ni. Category parukah nominate a ni a, chung zinga paliah chuan hlawhtlinna a chang. Best New Artist a la a, Pop Vocal Album a la bawk a, Song of the Year leh Record of the Year a la bawk.
Grammy sem tak tak hma hian show pui bera an puan ngai loh category eng emaw zata winner an puang chhuak hmasa phawt ṭhin. Famta, Joan Rivers chuan Best Spoken Word a dawng a, hei hi a album Diary of a Mad Diva aṭanga a dawn a ni. Gospel pawh he hunah hian puan a ni ṭhin. Best Gospel Performance/Song-ah Smokie Norful hla, No Greater Love thlan a ni a, Best Contemporary Christian Music Performance/Song-ah Lecrae leh For King & Country hla Messengers thlan a ni bawk. Erica Campbell album Help chuan Best Gospel Album a dawng a, Best Contemporary Christian Music Album hi For King & Country album, Run Wild. Live Free. Love Strong chuan a dawng. Mike Farris-a album Shine For All The People chu Best Roots Gospel Album-a thlan a ni.
Awards show ṭan a ni a, Australian rock band chuai thei lo leh huhang ngah em em reng, AC/DC-in an rawn hawng a, Rock or Bust leh an hla hit em em, Highway to Hell an rawn thlawh. A hnuah Sam Smith a rawn chhuak a, Best New Artist a dawng a, award hi Taylor Swift-in a hlan. "Oh, ka Pathian...Grammy ka dawng!" tiin a au chhuak. Ariana Grande pawh a rawn lâm arh arh a, Just a Little Bot of Your Heart a rawn sa.
Zai an ṭha hlawm, Tony Bennett leh Lady Gaga ten lawm an hlawh a, Adam Levine leh Gwen Stefani te an thiam thlawt. Ed Sheeran te ho zai pawh mipui an lawm a, stage-a a chet dan aṭang ringawt chuan Madonna hi kum 30 bawr vel chauh a la ni duh hmel! Usher leh Stevie Wonder te an hlu a, khawvelin Stevie Wonder hi a la ngaisang reng. Beck leh Chris Martin te an inkawp fuh bawk. Performer-te chanchin sawi sen loh a awm. Katy Perry-i hla sak, "By The Grace of God" kha Russell nena an
inṭhen a, hun harsa a tawh vanglaia Pathian khawngaihna a dawn a phuah chhuahna hla a ni e, an ti ṭhin.