The Chosen Kum li hnuah music video thar

A rei vang vang a nia...hman ni lawk emaw i lo ti mai thei a, mahse The Chosen-in music video an tihchhuah tawh loh chin hi kum li zet a ni tawh. Kum 2010-a an tihchhuah hnuah The Chosen video thar All These Years chu an peihfel leh tawh a, vawiin lam hi chuan TV-a dah theih tawh an inbeisei.

All These Years hi The Chosen music video pathumna tur chauh a ni a, kum 2010 kha an music video tihchhuah hnu hnun ber a ni. Zirna avangin Mizoram pawnah an awm vek a, kum li hnua a vawi khat nan tun Krismas khan an rawn haw khawm a, hei hi remchangah lain The Chosen hian music video hi an siam a ni.

All These Years hi Parema phuah a ni a, Zorimawi khawvelah chuan Parema hi kan hriat lar kha. He hla hi The Chosen an lo kal tawhna zawng zawng, Pathianin a lo hruai tawhna zawng zawng an thlirlet a, Pathian hnenah lawmthu sawi loh theih a ni lo tih chiang takin an hmu a, Pathian hnena lawmthu sawina hla a ni. Parema hi cancer natnain a tibuai ṭhin a, mahse tunah chuan Pathian khawngaihna avangin tihdamin a awm a ni. Tunhnai khan phaiah in-check-up-in an kal a, a ṭha zel e.

The Chosen video thar hi SVP kutchhuak a ni a, vocal hi Tawia Studio-a record a ni. An line-up a la ngai reng a, Fiona leh Mawitei ten vocal an la chang a, Sentei chu guitarist a ni a, Tetei'n bass a chang a, Malsawmi'n keyboard a la khawih a, Afeli'n drum a la vaw ngar ngar.

He band hi rimawi lamah an hlawhtling ang bawkin an member-te hi zirna lamah an hlawhtling zel. Afeli hian BE a zo tawh a, master degree a chhunzawm leh mek a, Mawitei pawh hian M. Com a zir mek. Fiona hian MA a zir mek a, Malsawmin B.Sc a zir mek bawk. Sentei'n kuminah BBS a zo ang a, Tetei erawh Australia lamah Marine Engineering zirin a awm mek a ni.