Kanye West-an Grammy a sawi buai leh

Kum 2009-a MTV VMA-ah, Taylor Swift-in award a dawn laiin Kanye West hi stage-ah a lawn a, Taylor Swift chu award dawng âwm lo a tih thu sawiin, Beyonce-in dawng se, a inhmeh zawk ang tih a sawi. Hetiang deuh bawk hian tun Grammy-ah khan Kanye West chuan Beck a rawn tibuai ṭep a, stage-ah pawh a chho zawk hman a, mahse tibuai em em loin a chhuk leh.

Album of the Year an puang a, Sam Smith te, Ed Sheeran te, Pharrell Williams ten an dawng lo a, Beck-a album thar Morning Phase chuan a dawng daih. Beck hian award a dawn zawh rual hian Kanye West pawh a rawn lang chhuak ve nghal chu a ni mai. Beck hian polite takin, "Rawn kal rawh, eng nge ni ta," a lo ti a, mahse Kanye West hi stage aṭangin a chhuk thla leh nghal. Mipui thawm a ṭha hle a, Beyonce leh a pasal Jay-Z te pawh an au ring a, kut an beng hial a ni.

Beck-an Album of the Year a dawng hi a lawm lem lo a, Kanye West hian a mawhpuh leh a beih ber zawk chu Grammy thuneitute leh judge te an ni. Mi tam tak chuan boruak siam nan a ti mai mai, a fiamthu niin an ngai a, West erawh a fiamthu lo. E!-in an kawmnaah West chuan, "Zaithiam tak takte rawn kir leh tura an duh a nih chuan hetiang mai mai hian min bawlzan kual tur a ni lo. Anni nen hian hetiang a nih reng chuan kan tiho thei tawh lo mai ang. Beck hian artistry a ngaihlu tur a ni a, he award pawh hi Beyonce hnenah pe se, a dik a ni," a ti.