American-ten an va hre lo êm

Ram tin hian anmahni rama mipui vantlang, tlema lehkha zir pangngai ve deuhina an hriat tur anga an ngaih general knowledge hi an nei vek. Mi tam takin kan ngaihsan America-ah hian an mipui vantlang hian an hriat tur ve renga ngaih an hre lo nasa hle!

Khawvel huapa milara kan ngaih American ṭhenkhat hian Britain pawh America-a state pakhat emaw an ti tlat hi a mawh lo chuang lo e, a tlangpuia thlirin American-te hi an GK a ṭha vak lo. Anni ai chuan i hrehnem daih mai thei a nia.
National Science Foundation-in survey an neihah chuan, 'Khawvel hian ni a hel nge, ni hian khawvel a hel zawk?' tih an zawhnaah, chhangtu 2,200 zinga zaa 25 te chauhin an chhang dik. Khawvelin ni a hel zawk tia chhang hi an tlem hle!
American mipui zaa 70 zette hian Constitution hi eng nge a nih an hre lo a, an ram Independence Day hi engtik ni nge tih hre lo pawh zaa paruk lai puitling zingah an awm! Lehkhathiam tam rama kan ngaih kha an ni.
Newsweek-in mipui zawhnaah an zawhah, zaa 29 zetin an Vice President hming an hre lo. Zawhna an zawh dang an hriat loh langsar em em, American pangngai chuan hre tura an ngaih si chu 'Indopui II-ah khan US hian eng ramte nge a do?' tih te, 'Martin Luther King Jr. hian eng nge a tih?' tihte a ni. Indopui II-ah hian US hian Japan, Germany leh Italy te a do a, Martin Luther King Jr. hi mihangten zalenna an neih theihnana bei a, mihângte zalênna sual chhuaksaktu a ni. US Independence Day hi July 4 a ni.
Kum 2009 daih tawh khan European Journal of Communication chuan Britain, Denmark, Finland leh US mipuite international affairs hrang hrang a zawt a, zawhna langsar tak chu 'Tute nge Taliban?' tih a ni. British, Finnish leh Danish mipui tam zawk chuan Taliban an hria a, Taliban beihnaa sulsutu leh meizanghlaptu ber America mi zawhna an zawh zatve vel zetin an chhang thei lo tawh bawk!
America-a party lar, Republican Party hi Grand Old Party tia sawi a ni ṭhin a, a lamtawiah GOP an ti. GOP lam pum hi American zaa 45 te chuan an hre lo! Forbes-in world map aṭanga American te GK hriat an tumah, pasarih zela pakhatin Iraq awmna an kawk dik thei a, zaa 17-in Afghanistan awmna an hre chauh. Zaa 51 zetin an khawpui lian New York awmna map aṭangin an kawk dik thei lo!
American zaa 25 te hian eng ram aṭangin nge independent an hmuh an sawi thei lo a, Hitler-an Judate a suat, Holocaust kha American zaa 30 te chuan an hre lo, eng nge holocaust an hre lo. Kristian tamna ram a ni chungin, American zat ve deuh thaw hian Juda sakhua aiin Kristianna a ding hmasa zawk niin an hre tlat bawk.