2024 Paris Olympics opening : Sporting event-a opening ceremony chhe berah mi tam takin ngai

2024 Paris Olympics opening chu July 26, 2025, Zirtawpni liam ta zan khan neih a ni a, opening ceremony-ah hian sakhua sawichhiatna lam hawi lantir nia puhin sawisel a hlawh hle. Mi tam takin Paris Olympics opening ceremony hi sporting event-a opening ceremony chhe berah an ngai.

Paris Olympics ceremony-ah hian drag-queen (tuai) themed imagery hmangin Kristian sakhua leh historical figure deuhsawhna lantir nia puh a ni. Leonardo da Vinci-a'n Isua leh a zirtirten zanriah hnuhnung an kil lai, 'The last Supper' ziah nuihsawhna nia ngaih chu drag queen hoin an rawn entir a, hei hian sawisel a hlawh hle. Sakhaw deuhsawhna lam lantir a ni hi Kristian chauh ni lo, sakhaw dang zuitu tam takin an dem thu an sawi bawk.

US tech firm lian, C Spire chuan he thil thleng avang hian Paris Olympics an sponsor-na titawpin, advertisement a tih zawng zawng a hnukdawk nghal tih a sawi. Kristian sakhua deuhsawhna lantir a nih avangin he thutlukna hi a siam tih a sawi. US-a conservative party leh right-wing leader lam pawhin an sawisel nasa hle a, sawiseltu zingah hian Donald Trump Jr leh billionaire Elon Musk pawh an tel. Musk chuan, 'Kristiante zah lohna lian tak a ni," a ti.

Bishops' Conference of France pawhin Inrinni khan 2024 Olympic Games ceremony-a drag queen hoin 'The Last Supper' chungchang tenawm taka an lantir chu an dem thu sawiin, pawi an ti hle tih an sawi. He thil hian khawvel puma Kristiante rilru a ti na hle a ni, tiin an tarlang.

Hetih lai hian Olympics opening ceremony artistic director, Thomas Molly chuan an show chungchanga sawiselna an tawhte hi a chhang a, midang/sakhua deuhsawh chu an tum a ni lo tih sawiin, an tum ber chu France ram nihna lantir a ni tiin, 'France-ah chuan rights tam tak kan nei a ni," a ti.

Opening ceremony-ah hian organiser lamin South Korea chu North Korea official name, 'Democratic People's Republic of Korea' tiin an puang bawk a, South Korea lam an lungawi lo hle. South Korea sports ministry chuan government level-in France sorkarah complaint thehluh an tum thu a sawi a, vice sports minister, 2008 Olympic weighlifting champion, Jang Mi-ran pawhin Olympic Committee President Thomas Bach chu hmuh a, hmaichhanah ngei an lawm lohzia thlen a duh tih a sawi. International Olympic Committee (IOC) chuan X lamah an tihsual avang hian thupha chawina an post a ni.