Pathianin Katy Perry a bia em ni?

I rin zawng a ni em? Mahse amah Katy Perry ber hian Pathianin a bia niin a sawi tlat. Super Bowl halftime-a a chet hma khan Pathianin a bia niin a sawi!

Kristian ṭhenkhat chuan an ringlo mai pawh a ni lo, Creation Museum-a an CEO, Ken Ham chuan a hla pakhat kha chu awmze nei lo, uih tawp niin a sawi a, a hla thu chu sual lam âwn ngar ngar niin a sawi bawk.
Katy Perry lah hian chiang a inti ngang mai thung a, tu emaw chuan an be ngei chu a nih hmel! "I hlimawm ang reng. Ka ṭawngṭai a, Pathian hnen aṭangin thu ka sawng a, 'hei hi i nei a, keiin nang ka nei che' min ti. Sakeibaknei chungah ka lo awm a, mi pakhat, ka hriat ngai loh a lo lang bawk a, chu mi chuan min en a, headset, a hmaa ka la hman loh a nei. Ka mitah tak min en a, 'Hei hi i nei e' min ti a, kei chuan, 'Oh, Pathianin ka ti thei ngei ang tih min nemnghehsak a nih hi,' ka ti a," a ti.
Super Bowl-ah hian Katy Perry hian kum 2008-a a hla hit em em, I Kissed a Girl leh hla dang ṭhahnem tak a sa a ni. I Kissed a Girl hla hi Ken Ham-a sawisel tak chu a ni. "Ka TV aṭangin ka lo thlir a, a hla thu khan awmzia a nei lo reng reng," a ti. Kohhran ṭhalaite chuan Katy an ngaihsan vak a rin loh thu a sawi a, mahse ṭhangthar zelte chuan an ngaisang zel nia a hriat thu a sawi bawk.
Halftime show-ah khan Katy hian Sam 118:24 thu a la chhuak a, a Twitter-ah a tweet nghe nghe. "Buddhist ka ni lo a, Hindu ka ni hek lo a, Kristian ka ni hek lo. Mahse Pathian nen hian inzawmna thuk tak erawh kan nei a ni. Mahni ka inthunun theih nan ka ṭawngṭai reng ṭhin. Lawmna tam tak ka chhar a ni," a ti.
A pa, Keith Hudson hi pastor a ni thung a, California-a Orange County-a evangelical pastor, conservative tak a ni.