Raltlan chungchang ngaihtuah zual turin Jolie-i'n khawvel hruaitute a nawr

Middle East leh a chhehvel aṭanga raltlanin khawvelin a chawkbuai hle a, UN hnuaia raltlante tana palai Angelina Jolie chuan khawvel pumin tun aia nasa zawka a buai phah lohna tur hian ram hruaitute chu hma la vat turin a nawr.

Raltlan hian a bikin Europe a khawih buai nasa tawh hle a, he buaina hi khawvel ram danga a kankai zel lohna turin ram hruaituten hma an lak vat a ngai a ni tih Angelina Jolie hian a sawi. Jolie hi tunah hian UN hnuaia High Commissioner on Refugees hnuaiah Special Envoy a ni mek.

"Khawvel hmun hrang hrangah indona hrang hrang a awm reng a, heng avang hian mi maktaduai 65 te chuan an awmna hmun an chhuahsan a ni tih hi miten hrethiam se, heng mite hi kan hlamchhiahin kan hnu­c­hhawn thei lo ang," a ti. Ram hruaitute chu an chên lailawkna tur leh anmahni ṭanpuina tur pek ringawt bakah, heng buaina hi a tawp hlen theih nana nasa zawka hma la turin a nawr a ni.

Raltlante tana a beihna leh hma a laknaah US secretary of state, John Kerry chuan Angelina Jolie chu a fak hle a, "Hetiang thil velah hian kum têl hna a thawk tawh. Hei hi a hlimpui thil a nih avanga ti a ni lo a, a nun zawng zawng a hlan a ni," a ti.