Jonghyun A hlawhtling mek

K-pop star-ten album an tichhuak chuah chuah a, chung zawng zawng ai chuan Jonghyun-a album thar a hlawhtling ber. Base album hi chu a larpui a, a hlawhtlinpui a ni. A album ngawr ngawr ni loin, he album-a track te pawh a hit em em hlawm.

January thla chhungin Johnhyun chart-ah a hlawhtling a, SHINee member hla Crazy (Guilty Pleasure) hian chart hrang hrangah hmun sang ber a luah a, hei chauh hi a ni lo, a hla dang, Base album-a mi bawk, Déjà-Boo chu chart-ah paruknaah a lang. Chart tih hian Billboard hnuaia K-pop bik chart a ni a, hei hi khawvela an hlawhtlin tak tak leh tak tak loh hriatna langsar ber a ni.

SHINee member-te hi an lo ṭha a ni a, Jonghyun-a band mate Taemin pawh chart lamah hlawhtlinna a chang sang hle a, pakhatna pawh a rawn hauh fo.

America-ah chuan January thla chhunga K-pop video en hlawh ber chu Jonghyun leh Iron te sak, Crazy (Guilty Pleasure) hi a ni a, pahnihnaah Keith Ape leh JayAllday, loota, Okasian, Kohh teho sak, It G Ma a ni a, G. Soul hla You chu pathumnaah a awm. Palinaah 4Minute hla, Cold Rain, panganaah INFINITE H hla Pretty a awm a, Jonghyun leh Zion. T te sak Déjà-Boo chu parukna a ni.

Khawvel huap pawhin Jonghyun hi a hlawhtling a, a hla Crazy hi khawvel puma K-pop video en hlawh ber a ni tho. Pahnihnaah chuan Jung Yong Hwa hla, One Fine Day, pathumnaah Mad Clown feat. Jinsil of Mad Soul Child te sak Fire niin, Jung Yong Hwa feat. YDG te sak Mileage chu palina niin, 4Minute hla Cold Rain chu panganaah a awm.