Fashion Fiesta
Hmangaihte ni a lo thlen meuh hi chuan a tu a te pawh mai hi kan boruak a danglam deuh riau lo maw? Eng atan mah ka ti lo, ti hlei hlei hi a ruka buai ru deuh an ni duh phian a nia. Inhuat inngei ai ngawt chuan inhmangaih chu a ṭha viau ta ve ang. Vawiin ni atan kan inbuatsaih mup mup mai thei, a nei saten kawppuite thil tur buaipui leh hun hlimawm hman tumin, a nei lote pawhin hmanpui tur leh a thar zawnna remchangah hmangin an ṭang hlei hlei emaw ni, kan nu leh pa thlengin, vawiin lama incheidan tur en ang u hmiang.
Kawr ngawr ngawr chu sawi zau vak ngaiah ka ruat lo, kawrfual, a bahna awm lo leh ramsa ziarang lang bag te leh boot rawng sang te hi ria sang lam tan a mawi bik. Blazer leh kawrfual, a rawng inzul vek te pawh tlema nu leh puithu deuh hleka chhuahvahna atan a ṭha phian ang. Mini Skirt leh t-shirt ho lam tak, tlema langsar lutuk duh lo tan a mawi phian. Tunlai boruak nena inmil tak mai Cape leh jeans kekawr i ngainat tak mai leh Valentine’s Day nena inmil tak pheikhawk sen vat mai te a mawi phian ang. Party leh hla deuh kal tumte tan phei chuan hak nuam nalh si thlan a ṭha. Jacket lian hlei hluai, i pa ta ni awma mawi, thawl deuh hlek leh cropped pants, kekawr tawngchham, ngal thleng lo deuh leh boot lar deuh ver vawr, langsar tak han bun leh daih ang chi te mipa lam tan pawh a ṭha phian ang. Tlema dangdai leh maksak deuh hleka inthuam duh tan Graphic top te leh leather pawnfen simple deuh hlek leh pumps te nen, a dangdai phian ang. Tlema nu deuh hlek leh tunlai si duh tan jacket ziarang nei leh t-shirt leh pawnfen lace te zan lama party tum tan a ṭha phian ang.
Kan tlangval lam erawh tuna ka rawn sawi ang khian tlema puithu deuh duh tan blazer chhungah i high neck kawrlum te leh cotton jeans te kha lo inbel ve leh phawt la, chass te nena in-date tur tan, a mimal taka inhmu tur i nih chuan i thawmhnaw simple ber leh rawng dangdai lutuk emaw, a uk te leh kekawr dum tawp leh loafers emaw, moccasins te nen lo inchhuih ve leh tawp mai rawh. Khua a vawt deuh bawka leather jacket hnuaiah kamis simple te ha daih la, cotton jeans rawng langsar deuh nen, combat jeans nen, dangdai deuh duh tan a ṭha phian ang. Blazer ziarang nei leh t-shirt thil awmze nei deuh hlek, a hmaa inziak te leh denim pants te nen, duhaia a lan nasat i hlauh chuan kekawr suede, design simple deuh hlek te nen a mawi duh bik.
Ka sawi tum ber mai kan lut ṭan tawh ang e. A incheina ngawr ngawr hi chu a tu a te mai pawh stylish ni thei vek khawpa fashion lama miril kan tam mai. Amaherawhchu kum tinin Valentine’s Day kan hmang a, kan hman dan leh a lan dan ngawr ngawr pawh thu hran, hnam ropui nge nge, khawthlang ram lamah chuan hemi nia kan incheidan rawng te leh rose par kan inpek fote hi awmze nei vekin an lo kalpui ṭhin a, helamah chuan kan duh duh kan ha chhuak mai ṭhin. New York khawpuiah vawiin na na na chu zuk chuang chhuak thut mai la, kawr rawng hak aṭang khan pawmlai nei i nih leh nih loh an lo hre mai dawn che tihna nih chu. Enchhin teh ang. Mi nawlpuiin zawm ve lem lo mah se a ti hmasaah lo ṭang leh phawts mai teh lem.
Valentine’s Day nena rawng inzawm tlat mai, a sen lar hi pawmlai nei, kei chu ngaihzawn chi ka ni lo a, chu mi kha mi pata sa ka ni e, tihna ang reng deuhin an inbel ṭhin a. Rose par hemi rawng (a sen) inpek pawh hi kan inhmangaihna i chhunzawm zel ang, ka ta i ni e, i ta ka ni e tihna lantir nan an hmang deuh ber. A senno, hei erawh kei zawng kawp lai nei lo, a duh tana bem theih ka ni e tih entirna niin, rose senno inpek chu va ngaihzawnna entirnan an hmang ṭhin. Serthlum rawng erawh ka lo nghak reng che ania tih entirna niin, hlimna a entir avangin, tlema mood off deuh te inkar, chhe deuh hlek te intuaithar nana inpek atan a ṭha hle a ni. A eng erawh inthianṭhatna entirna niin, ka inhawng e, amaherawhchu inthian ṭhatna piah lam erawh ka la tinzawn lem lo, tihlantirna niin, ṭhiante pek atan pawh rose eng chu a tihchi phian ang. A pawl vet thung le; mipa lam chan deuh niin zawnglai ka ni a, vawiin hian kawppui tur ka melh e tih lantir nana hman niin, mipa ṭhenkhatin pangpar pawl te mi va bem nan an hmang ṭhin. A hring erawh tu emaw ka beisei a, min chhanna ka nghak mek a, chhanna ka beisei mek a, a aw ngei dawn e, tih lantir nan an hmang deuh ber ṭhin. Grey erawh 'tiang vel hi ka tuipui ve lo, ti hian ka hlim ve tawk e tih lantirna niin, kawppui melh lem lo tana inbel chi niawm tak a ni. A var erawh mi pakhat tan ka inserh hrang tawh a, kawppui ka melh lem lo tihlantirna niin nupa leh reitak inkawp tawh ten rose var an inpe ṭhin. A dum erawh kei zawng ka duhin min duh ve lo a, ka malin ka riang hle a ni tih lantir nana inbel chi niin, a kip a kawiin zawm thei lo mah ila, tichhin reng reng teh ang u.
Tluangpuii hmar
instructress
vakiria institute of fashion technology