A chung berah Asanga Project ft Ruth Tochhawng 'Min en teh'

Asanga leh Ruth Tochhawng thawhdunna, country music lam ngainate tana beng fah tak mai, 'Min en teh' tih chu Khiangte Construction Ṭhazual Lengzem-ah pakhatna a rawn ni ta.

'Min en teh' tih hi Asanga phuah niin, recording hi Westeng Studio (Tluanga Hnamte) ah an ti a, video hi Osiama Pictures kut chhuak a ni thung. April 20, 2024 khan YouTube-ah an dah chhuak a ni. Country music lam a pawl a, hla thluk a mawiin a satuin a thiam bawk a, a music video a la hmuhnawm em em zui. Thlir leh ngaihthlak a nuam hle. Ruth Tochhawng hi a aw a mawiin eng hla pawh hneh leh nalh takin a sa thei zel mai a ni.

Lengzem Chart-a pahnihnaah Projek_Liantluang x David Darlong 'I tling tawk' tih a rawn lang a, he hla hi Dr Albert Vanliantluanga phuah niin, music & recording hi Tluanga Hnamte kut chhuak a ni a, Aeries visual & Hlutea ten music video hi an siam a ni thung. Tun ṭum chart-ah hian Projek_Liantluang hnuaia hla tih chhuah, Nunui 'I par dun ang' leh Guru Gee 'Ka tlei ve nan' tihte chu Top 10-ah an rawn lang bawk. Mendal x Smiley 'Kum za' pawh chart hmasaa No 9 aṭangin No 3-ah a invawrh chho a, Zothana 'Aw chhawrthlapui' chu No 4-ah awmin, Manuna 'Tawnthar di' chuan Top 5 rawn khar.

Top 10-ah hian MDM Lunglei Various Artists leh Angela Malsawmpari te pawh an rawn lang bawk a ni.