Pentecost Fak Zai neih a ni dawn ta

Mizoram UPC kohhran ṭhalai pawl, General Pentecostal Youth Department chuan Mizoram UPC Literature & Publication Board nena ṭangkawpin, mal zai intihsiakna 'Pentecost Fak Zai' an buatsaih dawn a, a vawi hnihna tur a ni.

Pentecost Fak Zai hi kum 2022 khan a vawi khat nan hlawhtling taka neih a lo ni tawh a, C. Lalhriatkimi chu pakhatna niin, Ṭhazual Award-ah 'New Artiste of the Year' nominee zingah a lang phak hial.

Mizoram UPC kohhran member-te tan inelna hi buatsaih niin, audition round hi online-a kalpui mek a ni. August 2, Zirtawpni zan hian a khuhhawnna neiin top 20 result puan nghal a ni ang. August 8 & 9 zanah top 20 intihsiakna neiin music track nena neih a ni tawh ang a, August 15 & 16-ah top 10 intihsiakna leh August 23-ah top 5 inelna neih niin, August 30-ah Grand Finale nei tura ruahmanna siam a ni - Top 10 chin aṭang hian live music nen inelna kalpui tur a ni.

Pentecost Fak Zaiah hian Zonet chu media partner niin, Zonet Bawhbel-ah live-in inelna hi pek chhuak a ni ṭhin ang a, General PYD YouTube channel lamah live-in pekchhuah a ni ṭhin dawn bawk.

Judge hi Rev. Dr. Ngurthanpara Sailo, C. Lalmuanpuii leh Upa F. Vanlalchama te an ni dawn a, Mizo Idol 2014 top 9 zinga mi Lalawmpuii leh Emilia Lalnunpuii ten an host dawn a ni.

Pentecost Fak Zai chief judge Rev. Dr. Ngurthanpara Sailo chuan, "Kum 2022 khan a vawi khat nan he inelna hi buatsaih a lo ni tawh a, Pathian zarah a hlawhtling hle. Kuminah pawh inelna hlawhtling tak kan buatsaih leh theih kan beisei a, kohhran mipui mai ni lo, Mizo mipuite kan zai intihsiakna min ngaihhlutsak turin kan sawm a ni," tiin Vanglaini a hrilh.