Underwood A hlain mite rilru a khawih
Baptisma a chan chungchanga hlaa a sak chhuahna, 'Something in the Water' chuan mite rilru a khawih hle. He hla hi Carrie Underwood-i hlaah chuan Jesus, Take the Wheel tluka rawn hlawhtling leh kha a ni.
Something in the Water hla hi Carrie Underwood leh Nashville hla phuah thiam pahnih - Chris DeStefano leh Brett James te nen an phuah a ni a, hla phuahtu zinga mi DeStefano chuan he hla hi an beisei aiin a hlawhtling tih a sawi nghe nghe.
DeStefano chuan, "He hla phuahtute zinga ka tel ve pawh ka insit rum rum a ni. Ka rilru hneh a, khawihtu chu he hlain mite rilru a khawih thu hriat hi a ni a, twitter-ah te an sawi chhual chamchi a ni. Twitter-a an ziah chhuah aṭang hian engtiangin nge mite rilrua hna a thawh tih a hmuh chian theih hle. Mite thinlunga hetiang taka hna a thawk hi awi harsa ka ti rum rum hial," a ti.
He hla hi baptisma a chan aṭanga Carrie Underwood nun danglam takna chanchin tiin a sawi theih ang. DeStefano pawh hi Kristian ṭha tak a ni a, a hlaa 'Khawngaihna mak, mawi leh duhawm' zeh tel a ni hi DeStefano chuan a tir takah chuan bridge ang tura an ruahman a ni zawk tih a sawi.
'Somthing in the Water' hi a Underwood hian a release hmain a audio clip a tichhuak chhin tawh a, a chhung thu a Kristian a, sakhaw lam kaihhnawih a nih avang hian sawiseltu an ṭhahnem hle. A hla thuah hian a pianthar dan, baptisma a chan dan leh, rinnain a nun kawng a kaihhruai dan a tarlang. Sawiseltu tam takten Jesus Take the Wheel a sak lar hlima an sawisel ang bawkin an sawisel leh a, Underwood chuan heng mite hi chhâng lêtin, Kristianna leh country music hi a inzawm a, a inlaichin tlat a ni, a ti.
Underwood chuan country music hi Bible belt (US-a chhim lam state leh chhim lam state, Kristian chakna leh huhang an ngah hmun sawina) aṭanga chhuak a ni a, Kristianna nen inzawmna thuk tak a nei tih sawiin, Isua emaw, Pathian chungchang emaw an hre peih lo a nih chuan thil dang ngaithlain, TV-ah pawh channel dang en mai trawh se, tiin a lo sawi tawh a ni.
Jesus, Take The Wheel hla aṭang tawh khan mi tam tak chuan Underwood hla thua Kristianna lam thil a tel hnem hi an lo sawisel ṭan tawh a ni