Valentines Day Ṭhalaiten thil Ṭha an ti

Valentine's Day, Inrinni-ah khan Association for Voluntary Blood Donation (AVBD) huaihawtin Mizo High School Hall leh district dang ṭhenkhatah thisen pek rûnpui, 'Blood for your Valentine' neih a ni a, khawpui pangaah thisen unit 633 pek a ni.

Blood for your Valentine hi Aizawlah chuan chawhma dar 10-ah ṭan niin, Aizawl Civil Hospital blood bank-a thawkte'n thisen an la a; thisen unit 417 pek a ni a, a petute hi mipa 324 leh hmeichhia 93 an ni.

Chhun dar 12-ah inkhawm tawitê hman a ni a, parliamentary secretary Joseph Lalhimpuia khuallian a ni. MSACS project director Dr Lalmalsawmi Sailo kaihhruai inkhawmah hian AVBD general secretary C Lalnunnema'n report a pe a, AVBD president PC Lalhmingthanga'n a ṭul hun apianga thisen pe tura blood bank-te'n an koh ṭhin Isaac Lalruatfela, Thakthing Veng hnenah chawimawina a hlan.

Blood for your Valentine-ah hian TBC Zaithan­puia, Lalduhsaki, Opheli leh Marilyn te host an ni a, thisen petu apiangte hnenah rose an lo pe zel ṭhin. Zaithiam ṭhahnem tak an zai a; host-te zinga mi TBC-a leh Duhsaki te bakah, Sawmtea, Temi Sailo, Hmingtea, Mami Varte, Lancy, Henry Varte, Feli Thangluah ten kal khawmte zaiin an áwi.

Mizo zinga thisen pe tam ber, Lalremruata, Electric veng Aizawl pawhin thisen a pe ve leh a, a record siam mek khûmin, vawi 57 thisen a pe ta a ni.

Lungleia Blood for your Valentine-ah pawh Bethsy Lalrinsangi a tel a; mipa 73 leh hmeichhia 43-te'n thisen unit 116 an pe.

Saihaah AVBD leh District Hospital blood bank huaihawtin thisen pek runpui buatsaih a ni a, mi 48-in thisen an pe a; Lawngtlaiah chuan mipa 27 leh hmeichhia pariatin unit 35 an pe. Serchhip-ah pawh thisen pek runpui buatsaih a ni a, mi 100 chuang thisen pek tumin kal mah se, blood bank lamin blood bag an neih tlem avangin mi 17 chauhin thisen an pe thei a ni.