Temi Sailo Kraws Thu hmun ropui a lauh

TBC-a a lâng rang a, Temi Sailo a rawn tlatlum thuai! Pensy-i pakhatna aṭanga a nekchhuah hnuah TBC-a chu Temi Sailo hian Dafodils Ṭhazual 10 - Faknaa pakhatna aṭangin a rawn nek chhuak ve leh ta.

Pakhatnaah ṭum khat chauh a awm hman tihin Temi Sailo hian TBC-a rawn chhuahtir a, TBC-a a tla chak hle, palinaah a tla thla nghal vawn vawn a, a hmaa TBC-an a nek chhuah, Pensy-i aiin a hniam ta zawk.

Temi Sailo pakhatna rawn nihna hla hi Kraws Thu a ni a, hei hi Temi Sailo-in ama puala music video a neih hmasak ber a ni. Music video hi a la ngah lutuk lo a, Rev. Killuaia album kha a ni leh mai. Tuna a hla, Kraws Thu phuahtu hi C. Lalruatkima a ni a, a hla phuah dangte Pensy-in a lo sa fo tawh a ni. Kraws Thu pakhatnaa a awm hi a awm lo hauh lo. A satu hi a zaithiam a, chu mai bakah a music hrim hrim pawh a ṭha. T-Melody-a an guitarist thiam tak Thanṭhawnga kutchhuak kha a ni.

October thla tawp khan Temi hian a video hi MDM-ah a dah chauh a, November 24 khan Dafodils Ṭhazualah hian 10-naah a rawn lang ṭan a ni. December 8 kha chuan pakuanaah a chho a, January 5 kha chuan panganaah a kai daih tawh. January 19 khan pathumna a ni a, chuan pahnihnaah chhoin, tunah chuan pakhatnaah a rawn kai ta a ni.

Pensy-i hla 'Chhan tlak ka ni em ni' chu pathumnaah a vawi hnih nan a la ṭhu a, pahnihnaah hian a hmaa pangana, Hmingtea leh Sailo Nutei te hla sak, Kir Leh Rawh chu a rawn chho. Palinaah TBC-a a awm a, a hmaa palina, Maggie hla Hmangaihna Par Tlanin tih chu panganaah a awm ta thung.

Top 10 aṭangin Bethsy-i leh TBCa te sak, Isua ka ṭhian tih chu a chhuak a, Betea a rawn lang thar ve thung. Ani hi music khawvela tawnhriat ngah tawh a ni a, a zaithiam a, hmalam a pan zel turah ngai ang. Bethsy-i hla thar, Min Hmangaih Si tih chu pasarihnaah a rawn lang thar leh ta bawk.