MSL Dance Battle

Basketball-a inelna lian tham tur leh, chu hun lo thleng tura mi tam tak hmuh chak, Mizoram Super League Halftime show-a neih ṭhin tur Dance Battle chu zanin hian a hawnna neih a ni dawn. Zanin hian crew tel tur 12 te an inlan vek ang a, an lam ang. Dance battle tur hian crew-te hian an inbuatsaih nasa hle tawh a, zanin aṭangin Best Dance Crew nih tumin theihtawp an chhuah nghal dawn.

MSI Dance Battle-ah hian Lay Up, Nerds of War, Emerge, Anonymous Signs, Myn’X, Monadikos, Crazy Bee, Sharp Kats, Diamond Shark, Dance N Beatz, Mystic Movers leh BGMX Crews te an tel dawn. Crew tinah hian members 4 aṭanga 6 tur an ni a, crew zawng zawnga dancer-te hi an vaiin mi 55 an ni.

MSL halftime apiangin Dance Battle hi a awm ṭhin dawn a, hetah hian a chakin Rs. 1000 dawngin, a chak loin Rs. 500 an dawng ang. A tawpah an overall performance a zirin Best Dance Crew thlan a ni ang a Best Dance Crew hian Rs. 10,000 an dawng dawn a ni. Dance Crew te hi Basketball Club te nena affiliate an ni a, team pakhatin crew pahnih zel an chang a, Khatla TBL-in Lay up leh Nerds of War; Zarkawt BCA-in Emerge leh Anonymous Signs; Zarkawt Serpents-in Myn’X leh Monadikos; Mission Veng Vikings-in Diamond Shark leh Dance N Beatz; Chaltlang Ryders-in Crazy Bee leh Sharp Kats leh Tuikual South BC-in BGMX leh Mystic Movers te an chang.

Inkhelh apiangin club-ina an chan crew pakhat ve vete an in-battle ṭhin dawn a ni.

Zanin bikah hian Crew 12-a dancers 55 te hi an lâm dawn a, an lâmna tur hi Mizo Dance Camp Creative Director, Alan Rinawma choreography a ni. Zonet Zawlbuk zan dar 8 aṭangin ṭan a ni ang.