Box Office: "Deadpool & Wolverine" in record a siam

Marvel Studio film thar ber, "Deadpool & Wolverine" chu rin lawk ang ngeiin a che ṭha a, box office-ah R-rated movie zinga tlangzarh karah sum la lut hnem ber record a rawn siam. Hei mai ni loin, film chhuak tawh zinga tlangzarh karah sum la lut tam pariatna a ni pha bawk.

Shawn Levy-a direct, Ryan Reynolds leh Hugh Jackman channa hian tlangzarh karah North America-ah USD mtd 205 a la lut a, R-rated film zinga tlangzarh kara sum la lut tam ber record lo siamtu, kum 2016-a 'Deadpool' sum lak luh USD mtd 133.7 chu a rawn khum chiang hle. Khawvel huapa a sum lak luh hi USD mtd 438.3 tling tawhin, R-rated film zingah December 2022-a tih chhuah, 'Avatar :The Way of Water' dawta hlawhtling ber a ni thei nghal der a ni.

North America bakah international market lianah pawh a che ṭha hle a, China-ah USD mtd 24, UK-ah USD mtd 22.1 leh Mexico-ah USD mtd 18.7 a la lut a, "Deadpool" franchise tan mellung pawimawh tak a rawn phun a ni. Marvel Studio film tih chhuah tawh zingah 'Spider-Man : No Way Home' hnua che ṭha ber a ni.

Research firm, EntTelligence chuan a kar khatnaah "Deadpool & Wolverine" hian viewer mtd 13.6 a nei niin a sawi a, audience zinga 11% hi kum 17 hnuai lam an tling.

Khawvel huapa film ngaihven hlawh ber ni mek, "Deadpool & Wolverine" hi Rempham'Ly Theatre, Aizawlah pawh chhuah ve nghal niin, show pawh hi ṭum dang aiin siam tam a ni a, kar khat chhungin show 40 chuang an siam. 3D leh 2D in pek chhuah a ni a, 2D hian zing dar 9 leh zan dar 9:30 a tih chhuah niin, 3D hian 11:30 AM, 2:00 PM, 4:30 PM leh 7:00 PM ah show a awm bawk. Ticket hi online-a book duh tan Bookmyshow-ah a book theih bawk a, an soldout chak hle.