WhatsApp-in double-tap reaction enchhin

Messaging app lar, WhatsApp chuan user-te tana hman nuam leh awlsam zawka siam turin ṭan a la chho zel a, hemi atan hian feature thar a duang leh. Android hmangtute tan message rang leh awlsam zawka react-na tur, double-tap chu Beta version-a a enchhin leh mek.

WABetaInfo chuan feature thar an siam tur hi tarlangin, user-te tana awlsam tur an ngaihtuah zel tih a sawi. Message react tura a message hmeh phawt a, emoji thlan leh phawt ngai ṭhin aiah, feature tharah hian double-tap hmangin a react nghal mai theih tawh dawn a ni. Double-tap hian automatic-in heart emoji a lang nghal dawn a, hei hi hman duh loh chuan emoji dang a thlan theih dawn tho bawk.

Hei bakah hian WhatsApp status reshare theihna feature thar an buaipui mek bawk. Tuna hman mekah chuan midang WhatsApp status share duh chuan screenshot phawt a ngai ṭhin a, hei bakah video-te a nih chuan download emaw, inthawn tir emaw phawt a ngai ṭhin. Hei hi awlsam zawka kalpui dan tur a duang mek a, Instagram-a midang story reshare theih mai angin, WhatsApp-ah pawh status-a an mention-te chuan awlsam takin an lo reshare ve thei dawn a ni. He feature thar hi Reshare Status Update tih a ni a, siam fel a nih hunah chuan status update-naah hian button thar dah ani ang. Tunah rih chuan buaipui mek a la ni chauh a, beta tester-te pawhin an la hmang thei rih lo a, mahse reilote hnuah enchhin theih beisei a ni.