MSL bul Ṭanna tak tak

Zanin Dance Battle-ah Monadicos leh Diamond Shark-ten indona ropui an ṭan tawh dawn

Thawhlehni zan khan Mizorama basketball-a intihsiakna puitham leh mumal tur Mizoram Super League hawnna, Tip-Off chu Lal Thanhawla Auditorium-ah neih a ni a, hetah hian MSL khel tur club hrang hrangte an inlan a, an club player leh model-ten home leh away jersey-te an entir nghal.
Mizoram Super League Tip-Off hi Chief Minister Lal Thanhawla'n ropui takin a hawng a, Sangtei Khuptong leh Essy Chhakchhuak ten zaiin mipui kal khawm an awi leh a, MSL Dance Battle-a inlan tur crew ten a huhoin an inlan bawk.
Bul an ṭan a, Dance Battle pawh an ṭan tawh dawn a, zanina intihsiak turte hi hmuh chakawm berte zinga mi a ni. Zain MSL-ah hian Mission Veng Vikings leh Zarkawt Serpents te an inhmachhawn dawn. He sports piah lama hmuh chakawm chu Vikings team crew, Monadicos leh, Serpents-ho crew, Diamond Shark-te hi a ni.
Monadicos hi hmeichhe hlang an ni a, Diamond Shark hi mipa hlang an ni thung. An lâm dan style a inang dawn lo hle dawn a, mipa leh hmeichhe intihsiaknaah a chang deuh dawn a nih hmel. Monadicos hi hmeichhe hlang an nih avangin an move pawh feminine a ni dawn a, Diamond Shart hi mipa an nih avangin male move, athletic lam, invawrh tih vel a tam dawn. Move inang lo tak tak, mihring inang lo tak takte intihsiak hi endiktute tan pawh thiam a har viau ang. A chak zawkin Rs. 1000 an dawng nghal ang a, a chak lo zawkin Rs. 500 an dawng ang.
MSL chhung hian Dance Battle a awm zel ang a, an lâm dan hrang hrang aṭangin a tawpa point hmu sang berin Rs. 10,000 an dawng dawn a ni. Zan khata chet ṭhat chauh a tawk lo a, Best Dance Crew ni tur chuan MSL chhung zawnga an perform a ṭhat a ngai dawn a ni.
Dance Battle-ah hian permanent judge pahnih leh judge dang pahnih an awm dawn a, permanent judge tur hi Mizo Dance Camp director, Faklam Intihsiaka pakhatna Ramthar Veng Branch KṬP te choreographer, Alan Lalrinawma leh, Tetea, Tuikual te an ni. Anni pahnih bakah hian rapper Reuben leh Nutei Pautu te judge an ni bawk ang a, anni pahnih hi chu an inṭhut chhawk ang.