MSL Tip Off-a a khuhhawn hnuah Essy hla thar zaninah

Kan inchhuan khum a hlau a, 'In chhuang mai lo la' tiin hla hmangin min rawn fuih hnuah, Essy chuan music video dang a peih leh ta a, a music video thar hi Zonet chuan zanin dar 6:50 hian Zawlbukah an tichhuak ang.

Essy hla thar hi 'Hey' tih a ni a, a title a tawi tek tawk khawp a, mahse sawi erawh a ngah thung ang. He hla hi MSL Tip Off-ah khan a khuhhawng a ni ber ang chu, a hmasa ber atan a sa a, MSL Tip Off-a kalkhawmte chuan eng ang hla nge tih an hria ang a, a ṭhat dan leh a mawi dan pawh an hrethiam viau tawh ang.

'Hey' hla hi duh deuh nei si, a duh deuhin ngaihsak si lo sawina a ni. He hla hi Mystic Sailo & Lal K Sailo te phuah a ni a, Foster-a record a ni a, video hi Hmingtea kutchhuak a ni thung. 'Inchhuang mai lo la' hlaah khan Miss Mizoram Lalchhanhimi model-ah a hmang a, mahse tuna a video-ah hi chuan khatiang kha a awm tawh lo thung ang. Model aiah dancer hman an ni dawn a, dancer-te hian MSL Tip Off-ah khan an ṭawiawm nghe nghe. A video-ah hian couple leh free style dance te pawh hmuh tur a awm nual ang.

A hmaa Zonet Ṭhazuala a lo hlawhtlin tawhnaah Essy hi a lawm hle. "Ka beisei leh rin aiin ka hla min ngaihhlutsak a, ka lawm em em a ni," a ti. "Ṭhazual chart-a pakhatnaa a lan hnu phei kha chuan sawmna pawh ka dawng hnem zual a, programme pawh ka ngah phah hle a ni. Kar kalta chhung zawng khan hunawl ka nei hman lo a, tunkar hi tlemin ka awl deuh a, karlehah hian ka hun pawh a khat leh hle tawh a ni," a ti. "Inchhuang mai lo la" hla kha Dafodils Ṭhazual 10 - Lengzemah Janaury 12 kar khan pakhatnaah a awm.

Hey hla hi R&B, Hip-Hop lam rawngkai a ni a, dancer a hmante nen pawh hian a inrem hle ang. Tuna mi hi a music video pahnihna chauh a ni a, Essy hi Mizo Idol aṭang khan kan hre ṭan a, top 20-ah a lang. Tuna a hla phuahtu hi Tetei Ralte feat. Reuben 'Si Maw' phuahtu kha a ni.