Khuanu Samsuih2 Budget-ah cheng nuai 12

Mizo film kan hlut tial tial a, a siamtu leh buatsaihtute pawhin an uluk tawlh tawlh a, sum pawh an seng huai tial tial. Khuanu Samsuih kha a hlawhtling a, original track pawh a lar hle. Tunah hian Khuanu Samsuih 2 siam tura hma lak leh mek a ni.

Khuanu Samsuih kha Hmingthangvunga hoa siam a ni a, Khuanu Samsuih 2 erawh zaithiam, Khuanu Samsuih original track satu, Kyusho Waza hoa siam a ni tawh thung dawn. Khuanu Samsuih 2 siam nan hian Rs. 1,200,000 budget-a dah chhin phawt a ni a, soundtrack pawh a hranpa hlaka siam leh a ni ang. A film kalhmang tur hi tragedy, love story, action a ni leh dawn.

Khuanu Samsuih 2-a changtu tur hian audition neih a ni dawn a, chuta tlingte chu inremna mumal tak siampui an ni ang. He film-a chang tur hian mipa leh hmeichhia ṭhahnem tak mamawh a ni dawn a, chan tum, chang duhte chuan Skynet Computer Chanmari-ah leh, Israel Electrical Store, Dawrpui Taxi Stand bulah form Rs. 50-in a lak theih. Kyusho Waza hi zai lamah a kal a, film lamah hian eng nge a nih i hre lo mai thei a, tunah hian Mizoram Film Development Society-ah hian Joint Secretary a ni mek. Film lama training-in India ram khawpui lian hrang hrangahte a kal tawh bawk a ni.

He film siamtu tur Kyusho Waza hian film bakah hian music lam pawh a buaipui chho mek bawk. A music video pakhat chu tunah hian a peihfel ṭep tawh hnuah duhthusam ang a nih loh avangin a thar hlakin siam ṭhat leh a ni dawn a, hemi atan hian Rs. 40,000 vel a ruahman bawk.