Hmeichhiate tan Angelina Jolie a thawk zel

Khawvel hmun hrang hranga raltlante zinga a thawh ang bawkin Angelina Jolie hian hmeichhiate chunga tharum thawhna leh pawikhawihna a tihtawp a nih theih nan theihtawp a chhuah. Hman ni pawh khan UK Secretary of State, William Hague chu puiin, London-ah hmeichhia, nghaisak tawk ṭhinte pualin centre an hawng.

London-ah hian School of Economics behchhanin, Centre of Women, Peace and Security chu William Gaue Hague hian a hawng a, hei hi indonaa hmeichhiaten nghaisak an tawh ṭhin beihletna tura Europe-a cnetre an hawn hmasak ber a ni.

Jolie hian tunhnai khan Iraq hmar lama Dohuk-a Kurdish raltlante awmna hmun a tlawh a, hetah hian hmeichhiate dinhmun a hmuchiang a, indona avanga hmeichhiate chunga pawikhawihna thleng nasat phah lutuk chu a vei a ni.

Centre hawnnaah hian Jolie chuan, "He centre thar kan hawn chungchang he hmuna zirlai thar rawn kal apiangtena an la ngaihven tur anga ka ngaih hian ka phur em em a ni. Hmeichhiate chunga pawikhawihna hrem loha a chhuah ṭhinna khawvel hian hmalam hun pangngai leh mumal tak kan nei thei lo ang. Ṭhangthar, mi inpe leh thiam, rilru chak leh phur zawk, he classroom-a ṭhu ringawt lo, pawna chhuak a, court-ah te danglamna ropui tak thlentir ngam kan mamawh a ni," a ti.

Jolie hian firfiaktena hmeichhe pakhat an man, an duh hun huna an pawngsual ṭhin chungchang a sawi chhuak bawk. "Tunah chuan lehkha a zir chhunzawm thei tawh lo chiang a, pasal neiin, chhungkua din tur pawhin a phut ngam tawh lo. A chhan chu an khawtlang nun angah chuan pawngsual tawkte chu zahpuiawm an ni a, an tan khawvel kawngkhar khar a ni tawh ṭhin," a ti.

Tunhnaia Jolie film siam pawh hi indona hmuna hmeichhiate harsatna tawh tarlanna lam a ni fo.