Fashion Fiesta

A hak tur lam leh a tunlai lam kan sawi zing ta malh malh bawk a, tun ṭum chu mimal taka kan ngaihsan, incheina khawvela lut tura ka rilru kuaihertu leh thiam ka tih tawp theih loh chanchin ziah ka chak tlat. An brand hming kan hmelhriat hle tawh ang, amaherawhchu, an chanchin, tute nge an nih hi kan chik ngai lem lo, a bik takin fashion student ten in hlawkpui ka beisei tlat. An hming ka hriat tirh chuan lam dan pawh ka thiam lo, fashion channel leh magazine ṭhenkhatah ka lo hmelhriat satliah ve mai a, a designer te hi an hmel avanga ngainat tur nise, hmel ngainat awm loh berte zinga mi an ni ang.

Kum 1994-a Elizabeth Hurley-in Versace gown dum sexy tak mai, safety pin lian tak maia thlun khawm a rawn hak chhuah meuh chuan khawvelin tu kawr siamchhuah nge a nih, tiin an ngaihven luai luai a, 2000 a Grammy Awards an sem ṭuma Jennifer Lopez-in gown hring, a hma lang thui tak mai, inhmeh tak maia a rawn hak chhuah meuh chuan, a tu a te pawhin Versace kut chhuak hâk chakin kan phe suau suau mai a ni. Gianni Versace chuan 1978 daih tawh khan Milan, Italy-ah boutique hawngin bul a ṭan a, unau pathum zinga a mi lai niin, a nu puanṭhui thiam thlazar hnuaiah naupangte kum 9 mi a nih lai aṭang tawhin thawmhnaw a lo siam chhuak daih tawh mai a, kum 26 a tlin meuh chuan Reggio aṭangin Milan-ah insawnin, designing a luh chilh tak tak hmain architech lam a zir hmasa a. Greek thawnthua Zeus pathian te leh an incheina te an insak ropui tak te leh an bang ker mawi dangdai leh ropui tak tak te hian nasa takin a thawmhnaw siamchhuah te hi influence nasa hle a. Thawmhnaw mai ni lo, inchhung bungrua, inkah rimtui, hmai hnawih eng ilo te leh mipa lam thawmhnaw te, a beh leh bun chi lam thlengin an siam chhuak ṭhin a ni.

1997 July 15 khan kum 50 mi chiah niin, a in Miami beach kawtah a zing tlan haw lam kahhlum a ni a, a kaphlumtu pawh hi a hnu lawkah a inkahhlum ve avangin a kahhlum chhan leh vang vawiin thlengin hriat a ni ta lo. A boral hian a kawppui Antonio De Amico, hun rei tak chhung a lo kawp tawh chu kalsanin sum ṭhahnem tak a hnutchhiah nghe nghe. A boral hma lawk hian a beng cancer a ni tih an hmuchhuak. Khawvelin a ui em em a, a bikin incheina khawvelah sulhnu a ngahin, ṭhian ngaina tak a ni bawk nen. A boral hnu hian a u, Sento-in an sumdawnna hi enkawl chhunzawmin, a nau Donatella, mi tam zawkin Versace kan hmelhriatna zawk hi Head Designer niin vawiin thlengin an hna hi an chelh chhunzawm ta zel a ni. A sulhnu langsar zingah chuan History world tour, Michael Jackson-an kum 1996 leh 97-a a neih ṭuma a thawmhnaw hak zawng zawng te, '96-a Tupac-an Versace trademark, Medusa lem chuang, rangkachaka siam te leh, Eminem-an a album, Marshall Mathers LP-a criminal hla kha Gianni thihna chhungchang hla a ni nghe nghe. 1984 khan Ford company chuan inremn siampuiin limited edition car nalh chungchuang tak mai, Lincoln Mark 7 chu a siam chhuak a, a chhung cheina leh dashboar-ah te an trademark chuantirin a seat leather te chu dangdai taka duan vek a ni. Vh1 fashion Award 97 & 95 te leh TV series Miami Vice, Born Yesterday, Once Upon a Crime te leh Shakespeare Shorts leh a dang ṭhahnem takah te a sulhnu hi hmuh tur a awm nual a ni. Rimawi khawvel leh incheina khawvel thlunzawmtu pawimawh tak pakhat niin, hetiang mi dangdai tak hi khawvelin kan hmu leh tawh lo mai thei a ni. Amah hriatrengna leh chawimawina ni pahfawmin a chanchin tlema zawng ka'n tarlang a ni e.

Tluangpuii Hmar
Instructress, VIFT