'Thisen hlu' a pe zel!

NGTVA khan a larpui hrep tawh a, a hla thu a ṭha a, a nalh viau a, tunhnaiah Sawmtean a sa thar leh a, miin an la hlut zel. 'Thisen hlu a pe' tih hla hi Sawmtea hian a zaina apianga an thlan ngun leh, zai tura an sawm chang pawha sa tura an ngen ber hla niin a sawi a, hmun ṭhenkhatah phei chuan ṭum sarih zette a sa hial.

Sawmtea chuan, "Kei pawhin he hla hi chu ka duh hle a ni. Setana tlawmna leh, Pathian hnehna ropui tak mai puan chhuahna hla a ni a, hnehtu Pathian ropuina hi paunchhuah zawh sen a ni lo. He hla ka sak hi chuan rilru zawng zawngin ka sa lo thei lo a ni. Ka sakna hmun apiangah Pathian ropuina puan chhuah hi ka tum ber a ni zel a ni," a ti.

Puanvar Sin tih leh, A Mite tan Thil Ṭha ui Lo tih hlate Sawmtea hian a lo hlawhtlinpui tawh a, tunah hian a dang a buaipui leh mek a, engtikah nge video thar tur hi an shoot ang tih erawh a la sawi thei lo. Recording a duhthusama an tih zawh phawt hnu lam a nih hmel.