Teh dan tharah Venezuela an rethei ber

Ram hausa leh rethei tehna hrang hrang a awm a, tun ṭum chu John Hopkins University leh Cato Institute te chuan ram rethei, ti ila, mipui hlim lohna leh nuam lo tihna ram, misery rating a siam a, chutah chuan Venezuela chu pakhatna a ni.

Misery rating siamah hian ram 108 an lang a, chutah chuan point hmu sang sang kha ram nuam lo an ni mai. An tehna hmanrua chu hna nei lo tam leh tam loh te, pawisa punna rate san leh san loh te, mipui mamawh thil man san leh san lohte chu a langsar pawl a ni.

Hetianga teh hian Venezuela chuan point 106.03 zet a hmu a, point a hmuhhnemna chhan lian ber zingah mipui mamawh thil man a san vang a ni. Argentina chuan a dawt a, anni pawh hi consumer price san vang bawk a ni. Ram buai tak ni mek Suria chu pathumnaah a awm a, unemployment chu an harsatna lian ber a ni a, Ukraine chu palina niin anni pawh unemployment bawk an harsatna. Iran chu unemployment avangin panganaah an lang.

Khawvela ram langsar ṭhenkhat zingah Spain chu 16-naah an lang a, hna neih lohna chu an buaipui a ni. Palestinian Territories, Kazakhstan leh Russia te pawh a sang pawlah an tel. Hetiang zawnga teh chuan China dinhmun a ṭha hle a, 106-na chauh a ni a, khawvela ram nuam ber pawl angin a lang. UK chu 86-na a ni a, USA 95-na niin, Germany chu 99-na a ni.