Billboard chart-ah K-pop in ro an rel

Billboard album chart tharah K-pop in ro an rel a, Stray Kids mini album 'ATE' chu No 1-ah awmin, BTS Jimin 'MUSE' chu pahnihna a ni. Billboard 200-a K-pop album-in top two an luahna hmasa ber a ni.

'ATE' mini album hi July 19-a tih chhuah kha niin, Stray Kids hian album chart-ah No 1 ni thei panga an neihna a ni ta. Hemi hma hian 'ODDINARY', 'MAXIDENT', ‘⭐⭐⭐⭐⭐ (5-STAR)’ leh ‘ROCK-STAR’ te chu chart chung ber dinhmun hi an lo thlenpui tawh bawk. 'ATE' hian kar liam ta chhung khan US-ah equivalent album unit 232,000 neiin, an album-a hlate hian on-demand official stream mtd 19.5 an nei tling bawk. Traditional album sales hi 218,000 neiin, kumin Taylor Swift 'The Tortured Poets Department' dawtah kumina album sales tam ber a ni.

Jimin solo album 'MUSE' chu No 2-ah awmin, equivalent album unit 96,000 a nei bawk. Jimin hian a album hmasa, 'FACE' chu Top 2-ah a lo lanpui tawh bawk a, K-pop solo artist zingah Billboard 200 Top 3-ah album pakhat aia tam lanpui thei awmchhun a la ni. Chart hmasaa No 1 hauhtu, Eminem 'The Death of Slim Shady (Coup de Grace)' chu No 3-ah a tla thla a, equivalent album unit 79,000 a nei. Taylor Swift 'The Tortured Poets Department' chu No 4-ah a la awm chhunzawm zel thung a, Top 5-ah Zach Bryan 'The Great American Bar Scene' chu No 3 aṭangin No 5-ah a tla thla bawk.