Malaysian Festival-in The 1975 a khing
Malaysia-a Good Vibes Festival organister-te chuan British band, The 1975 leh a member-te chu nikum July thlaa festival-naa an rama anti-LBGTQ law dodal zawnga an chet avangin USD mtd 2.4 chawi turin UK High Court-ah an khing.
Nikuma Good Vibes Festival neihah khan 1975 hi an perform a, stage-a a inlan laiin Malaysia rama mahni anpui kawp khapna dan hman duh lohna lantirin, frontman Matty Healy chuan bassist Ross MacDonald a fawp a ni. He thil thleng avang hian festival hi tihtawp a nih phah bawk.
Festival organiser, Future Sound Asia chuan band hnenah hian an rama thil khap chungchang pawh hriattir lawk vekin, anni pawhin dan zawm hi an remti tih an sawi. Mahse an perform hnuah inremna palzutin, an ram duh loh dan tak leh huat zawng takin an che zui a ni, an ti. An thiltih avang hian a tukah organiser licence hi tihtawp sakin, festival ni hnih la awm tur pawh ṭhulh a ngaih phah tawh bawk a ni. Malaysia sorkar chuan 1975 chu an rama perform a remti tawh lo bawk a ni. An conctract an bawhchhiat vang leh, an sum hmuh tur tam tak an chan phah avangin 1975 chu USD mtd 2.4 chawi turin an khing ta a ni. Future Sound Asia hian The 1975 hi USD mtd 2 chawi turin a lo hriattir tawh a, mahse band lam hian an chhang zui lo a ni.