Mi bik panga zingah Taylor Swift
Taylor Swift album thar 'Folklore’chu a zawnin kar li chhung Billboard 200 chart-ah No.1 a ni ta a, album paruk hetiang dinhmun thlenpui hi a nei tawh a ni.
Tleirawlte niin Taylor Swift hian country music a rawn luhchilh a, kum 2006 khan a album hmasa ber 'Taylor Swift' a tlangzarh a, khawvelin a hmelhriat rang hle. Hemi aṭang hian kum 14 lai ral tawh mah se a larna a chuai thei lo a, chanchin chhia a nei lem lo bawk nen a lar a katluang a, Billboard phei chuan Woman of the Decade-ah an thlang hial a; American Music Awards-ah pawh Artist of the Decade chawimawina a dawng hial bawk.
Hetiang khawp hian rimawi khawvelah mi bik a nihzia a pholang tawh a, tunah Billboard chart hmangin mi bik a nihna a rawn pholang leh ta a ni. Billboard 200 chart hi kum 1956 March thlaa buatsaih
ṭan a ni a, kum 64 a liam tawh. He kum 64 chhung hian album paruk (leh a aia tam) Billboard 200 chart-a kar li chhung No.1 dinhmun dinpui thei artist pali chiah an la awm a, Taylor Swift hi a pangana chiah a ni ta! Mi bik tih loh rual a ni lo.
Hmeichhe zinga a awm chhun
He dinhmun danglam bika ding thei hmeichhe awmchhun chu Taylor Swift hi a ni. Siwft hmaa he record lo siam tawhte chu mipa vek an ni a, group ni lo, solo artist zingah chuan a pathumna chiah a ni bawk.
Swift hi a kar 41-na atan Billboard Artist 100 chart-ah pawh No.1 a ni tawh bawk a, kar hmasa khan he dinhmuna ding rei thei ber record hi a siam tawh a, pen khatin hma a sawn leh tawh zawk tihna a ni.
Mibik dang palite chu
The Beatles khan record an siam pui hle a, album 15 lai Billboard 200 chart-ah kar li leh a aia tam No.1 an nihpui. The Fab Four album hi chu khum a harsa hle tawh ang. King of Rock and Roll Elvis Presley khan Swift ang bawk hian a album paruk chu he dinhmun hi a thlenpui a, the Rolling Stones pawh Presley leh Swift-te nen hian huang khatah an awm. Garth Brooks pawh anni huangah hian a awm ve bawk.
Taylor Swift-in huang khata a awmpuite hi 'legend' ṭhiau an ni a, khawvel awm chhung chuan music huang chhungah chuan Swift hi sawi nep theih a ni tawh lo ang.
Billboard 200 char Top 10:-
1 Folklore Taylor Swift
2 Shoot For The Stars Aim For The Moon Pop Smoke
3 Legends Never Die Juice WRLD
4 Rich Slave Young Dolph
5 Hamilton: An American Musical Original Broadway Cast
6 Pray 4 Love Rod Wave
7 My Turn Lil Baby
8 BLAME IT ON BABY DaBaby
9 Hollywood's Bleeding Post Malone
10 Fine Line Harry Styles