Selena-in depression a nei nasa

Mi sawi a hriat vanga depression nei a ni lo, Justin Bieber hi a hmangaih a, thlah harsa pawh a ti. Mahse Justin Bieber lah heti phelphual hi a nisi a, tunhnaiah an inṭhen leh. Hetiang inlaichinna mumal lo tak hian hman aṭangin Selena Gomez hi a tibuai tawh a, chu chuan nikum aṭang khan depression a neihtir a ni.

Selena chuan nikum khan rehab-ah vawi tam tak a kal a, depression a neih aṭanga chhuak turin nasa takin ṭan a la a, mithiamte pawh a rawn nasa tih a sawi. Hei bakah hian harsatna tam tak a nei a, chung zinga pakhat chu milar a nihin amaha pressure a siam hi tuar harsa a ti hle bawk. Paparazzi te avangin a nun a ralmuang lo hle tih a sawi bawk a, chu mai bakah mipuiin eng angin nge an sawi leh ang tih hian a rilru nasa takin a tibuai ṭhin niin a sawi bawk.

A nunah chiaina (anxiety) a awm reng bawk a, him lo nia inngaihna leh inhriatna a nei nasa hle bawk. Hengte hi tunah chuan a hneh chho mek niin a sawi bawk. "Hun eng emaw ti lai khan depression avangin harsatna ka tawk a, in pawh ka chhuahsan mang lo a, ka inkhung chawt a ni. Ka â deuh huih hian ka hre ṭhin," a ti. "Ka chanchin an ziah reng reng chu ka chhiar hreh em em a, chhiar pawh ka chhiar ngai lo," a ti bawk.

Depression te hi mahni maia tuar chu a hahthlak ṭhin a, ṭanpuitu leh puitu zawn nachang hriat a ṭha. Depression neia kan inchhal lai hian depression tak tak a ni em tihte fiah nachang hria ila. Damdawi hmanga enkawlnate a awm tih hriat tur. Ṭhenkhat chu depression ni si lo, anga kan ngaih a awm ṭhin a ni.