Kristian hunpuiah Kristian tana hmuh chakawm
Kristiante hunpui pawimawh ber Lent kan thleng tawh a, Nilaini kha Ash Wednesday a ni a, hemi aṭang hian Lent inṭanin, Maundy Thursday thleng a ni. Hemi hun chhung hian US-ah chuan film ṭha, a bikin small screen (TV) lamah a chhuak nasa dawn.
Lent chhung hian US-a network lian ber ber, CNN, National Geographic leh NBC te chuan Lent pual hian Kristian film an tichhuak hlawm dawn a, an film tihchhuah tur hian Easter Sunday thlengte a awh ang.
CNN tihchhuah tur hi 'Finding Jesus' a ni. Kum sang hnih liam taa milar leh a hunlaia amah hre chiangtute ngaihsan chu Isua Krista kha a ni. Culture, politics, education leh literature-ah a influence a nasa a, tun thlengin a la na em em. Hemi chungchang hi CNN tihchhuah tur Finding Jesus-ah hian tarlan a ni ang a, chu baka tihlan an tum ber chu amah ngeiin hmuh theih tur, physical thil hnutchhiah a nei em? tih hi a ni ang. Documentary type tur a ni. Hemi atan hian thil laihchhuah leh scientific research hrang hrang hman a ni ang.
He documentary-ah hian Isua laina hnai kuang an laihchhuah nia an sawi chungchang tihlan a ni ang a, a chhunga ruhro awmte chhuichian a ni nghal ang. He kuang hi kum 2002-a hmuhchhuah kha a ni a, kuang chhînah hian 'Jakoba, Josefa fapa, Isua unaupa' tih a inziak a ni.
National Geographic-in a tihchhuah tur thung hi Killing Jesus tih a ni. Tumkau Nia tihchhuah a ni ang a, lehkhabu ziak awm behchhana siam a ni. Lehkhabu ziaktute hi Bill O'Reilly leh Martin Dugard an ni a, anni pahnih ziak, lehkhabu dang pahnih - Killing Kennedy leh Killing Lincoln te chu National Geographic hian film-a siamin an lo tichhuak tawh a, a hlawhtling dun hle a ni.
He film-ah hian Isua nun mai bakah politics thil, rawng taka tihhlum a nih theihna tur chhan, a hunlaia politics boruak leh Lal Isua inhmachhawn dan vel tarlan a ni ang. Darkar thum awha thui a ni dawn a, ram 171-ah ṭawng 45-a tihchhuah a ni ang.
Khawvelin a beisei tawh, a nghahhlelh tak mai chu A.D.: The Bible Continues hi a ni. Hei hi The Bible, miniseries hit tak, History Channel-in a tihchhuah siamtu, Mark Burnett leh Roma Downey te siam a ni. Kum 2013 khan The Bible an tichhuak a, small screen-ah, nikum khan Son of God chu big screen-ah an tichhuak leh bawk a, a hlawhtling em em ve ve a ni. Tun ṭum chu NBC-in an tichhuak ang.
Easter Sunday-a tihchhuah tur a ni a, he film-ah hian Isua thih hnua ringtute awm dan, Kristianna darh zel dante tarlan a ni ang. Hei bakah hian Isua nu Mari chanchin te, ringtu hmasa zinga hmahruaitu a nih dante tarlan a ni dawn bawk.