Jeremy leh Adrienne Camp-te'n worship album siam dawn

Christian music artist lar Jeremy Camp chuan social media kaltlangin Adrienne Camp nen album thar 'The Worship Project' an buaipui mek tih tarlangin September 4 hian an tlangzarh dawn thu a sawi.

'I Still Believe' film vanga kumin chhunga miin a chanchin an ngaihven em em Jeremy Camp chuan an project thar chu chhan hrang hrang vangin a special hle tih a sawi a, Adrienne chu a nuna mi pawimawh tak leh a rawngpawlpui reng ṭhin ni mah se project puitling an buaipui awmchhun a la nihna chuan an project chu a tihlu hle niin a sawi a ni.

Jeremy Camp chanchin film-a siam 'I Still Believe' en tawhte chuan Adrienne Liesching nena an intawn dan hi an hre ṭheuhin a rinawm a, an nupaa album thar an buaipui pawh hi Gospel music ngaithla ṭhinte chuan an ngaihlu hle ngei ang.

Kum 42 mi lai ni tawh Jeremy Camp hian album 12 lai a tichhuak tawh a, GMA Dove Award paruk lai a dawng tawh bawk. A nupui hmasa Melissa Lynn Henning-Camp nen khan kum khat chiah an innei hman tihin Melissa kha a thi a, kum 2003 khan Adrienne nen hian an innei leh a ni.