BLACKPINK ft Selena Gomez ICE CREAM flavour thar Selena-i'n a siam
K Pop group thawm nei ring ber pawl leh huhang ngah tak Blackpink chuan an album thar tura hla pakhatah khawtlang lam zaithiam duhawm tak Selena Gomez an thawhpui a, naktukah hian an hla thar hi an tlangzarh dawn.
An hla thar tlangzarh tur hi 'Ice Cream' tih a ni dawn tih an puangzar tawh a, poster leh snippet hmangtein an fan-te chawkphurin 'teaser' video-te an drop zeuh tawh bawk nen, BLINK ho chu an inralring tawh hle ang.
Teaser video tawite an tlangzarh tawhah chuan Selena Gomez-in Blackpink fan a nih thute a sawi a, an thawkho hi a phur hle a niang, New York'-a Serendipity restaurant neitute thawhpuiin pink vanilla ice cream, crunchy cookie bites leh fudge-te a siam Cookies & Cream Remix an siam a, naktuk hian he Ice-cream flavour thar hi an tlangzarh nghal dawn bawk.
Hemi chungchang hi Selena hian a social media account lamah phur takin a sawi chhuak a, Thawhṭanni khan video chu dah chhuakin ice-cream tui tak a nih thu a sawi uar hle. Ice Cream bawmah chuan Selena lem cartoon-a siam a chuang ngei bawk a ni.
Blackpink hian hun eng emaw chen hla thar an tihchhuah loh hnuah hmanni lawk khan hla thar 'How You Like That' an tichhuak a, streaming service hrang hrangah record an siam nghal a nih kha. BLINK lam an ṭang na bawk a, an hla thar pawh a lar chak vet vet hle.
Zirtawpni liam ta khan K Pop group huhang ngah em em mai BTS chuan an hla thar 'Dynamite' an tichhuak a, khawvel pum nghawr nghing nghalin YouTube leh streaming service hrang hrangah world record an rawn siam nghal pawp pawp mai a, hei hi ARMY ho thawhrim rah a tih loh theih loh. Chumi boruak kalzel azarah chuan Bungzung Kohhran Pavalai zaipawl hla 'Zoram Pavalai' pawh tunah hian Mizoramah a 'trending' mek a ni.
Naktukah mai hian Blackpink hian an hla thar hi an tlangzarh dawn a, ARMY nge thawm nei lian dawna BLINK tih hriat a chakawm hle mai a, BTS record siam sa hi Blackpink-in an khum thei angem tih chu an fan-te kutah a innghat thui hle. Group inel chu ni lo mah se K Pop group, khawvel pum huapa huhang nei ngah tak an nih avangin khaikhin pawh an awl hle a ni.