Oscars Awards Sawiselna leh dodalna karah
Aacdemy Awards tia official-a an sawi, Oscar tia kan koh mai chu Kodak Theatre, Los Angeles-ah sem a ni ta. Sawiselna leh dodalna tam tak a awm a, chutiang karah chuan tluang taka sem zawh a ni.
Eddie Redmayne chuan Theory of Everything hmangin Best Actor a la a, Still Alice-a a changtunu Julianne Moore chuan Best Actress a dawng. Film malah chuan The Grand Budapest a hlawhtling ber a tih ngam ang. He film hian award pali ngawt a la a, chung a award lak zingah chuan Best Costume Design leh Best Makeup And Hairstyling a te.
Keinin hmuhnawm kan tih lem loh tak, che ṭha em em si chu Birdman hi a ni. He film hian Best Director a la a, Best Original Screenplay a la bawk. Whiplash chuan Best Sound Mixing a la a, American Sniper chuan Best Sound Editing a la thung.
Best Supporting Actress-ah Patricia Arquette thlan a ni a, Best Supporting Actor hi JK Simmons chuan a hawn thung.
Oscars hi an sawisel nasa hle a, an sawiselna ber chu chi inthliarna chungchang a ni. Mingote thunun leh, mingo tan lo chuan award ngaihhlut ber ber pawh lak theih loh ang hian lang chungchangah khawvel hmun hrang hrang aṭangin an sawisel a, Los Angeles-ah pawh protest tawk an awm nual a, boycott tawk pawh mi sang chuang an awm.
Oscar host, Neil Patrick Harris pawhin fiamthuin, 'Zanin hian Hollywood-a ṭha ber leh ngo ber...ka tih awmzia chu bright ber' tiin fiamthu ti takin a sawi chhuak zauh nghe nghe. He a thusawi hi Twitter lamah chuan an fak nasa hle a, huaisen an tih thu mi ṭhenkhatin nasa takin an sawi chhuak. Mihângten zalenna an neih theih nana nasa taka beitu Martin Luther King Jr. chanchin film-a an siam, Selma pawh hi mihâng chanchin ni loin, a changtute hi mingo ni ta se, hei hian a thleng sang ang, tiin twitter leh social networking site-ah te an sawi nasa hle.
Zai an ṭha hlawm, Maroon 5-in bul an ṭan fuh a, chumi hnua zaiho pawh khawvel huapa zaithiam lar an ni hlawm. Lady Gaga, Rita Ora, Jennifer Hudson te chu kan hre chiang hlawm. Rapper Common leh John te zaiin mipui a vel nasa hle, thiam an ti hle a ni. Country singer a ni tih hriat tur takin Tim McGraw chuan lukhum parh a rawn khum chhuak a, I'm Not Gonna Miss You hla a rawn sa. Zaithiam dang tam tak an zai a, hei bakah hian movie-a original track satute an rawn lang bawk. Khawvelin Oscar hi a hlut a ni.