Triau Trackx Music Video thar vawiinah an tichhuak dawn

Valentine's Day puala hla siamte kan ching a, mahse Chapchar Kût puala hla tihchhuah nachang erawh kan la hre lo. Kan changkân khum pawh a ni mai thei. Mahse Triau Trackx chuan Mizote hun pawimawh Chapchar Kût puala video tihchhuah nachang an hre tlat! Vawiin aṭangin Triau Trackx music video thar YouTube leh Zoland.in-ah te dah chhuah a ni dawn.

Album tur an buatsaih a, March thla hian tihchhuah hman hram an tum a, amaherawhchu anmahni mimal hna ṭul avangin a hun an pawt hla leh. Engtikah nge tih erawh sawi fak thei rih lo mah se rei chu a ni tawh hauh lo ang. Chumi hma chuan an reh rei lutuk a, mi tam tak ngaih a ṭhat loh hman an hlau a, music video an rawn tichhuak a ni.

Triau Trackx video thar hi 'Hmalam i pan ang' tih a ni a, acoustic chauh a ni. Video-ah hian Ruatfeli a lang deuh ngawr ngawr a, a kalphung pawh an hla hmasa ṭhenkhat nen chuan a inang lo deuh. He an music video thar hi an album tihlar lawkna tur a nih hmel a, engtiang takin nge kan ngaihthlak nasat leh dawn tih sawi lawk a har a, mahse Zo rimawi khawvelah chuan hla hit a rawn nih leh a rinawm viau.

'Hmalam i pan ang' tih hla hi insuihkhawmna tur lam hla a ni a, hla ṭha, hnam leh mimal ang zawng pawha mi cho chhuak thei tak a nih hmel. A music kalhmang ngaihthlak a chakawm viau tawh a, eng ang music genre-ah nge kan thun ang tih hriat a chakawm. Triau Trackx music hi ngaihthlak a nuam a, tunlai tak si, ṭhalaite duhzawng tak tura siam an thiam riau, hei hi an hlawhtlinna bul a ni. An music genre a chi hrang a tam a, kan tui tlan vek theih niin alang.

Triau Trackx hian an music video tihchhuah hnuah album an buatsaih an chhunzawm chho zel ang a, album an tihchhuah hnu hian Mizoram khawpui lian hrang hrang fanga concert tour neih an tum a, an inruahman chho zel.