MDM Artist hla thar neite

MDM Artist Ngur­than­sanga chuan a official music video hmasa ber 'Chalmar Zai' a tichhuak.

Seraphic Choir member ni mek Ngurthansanga hian a hla thar hi HC Recording Studio-a a record a ni a, music chu Chda Vh(Seraphic Choir Director) kut chhuak niin video chu Abby Himself kut chhuak a ni thung.

Ngurthansanga hi Youth Icon, 2019 Top 10-a lang pha kha a ni a, 'Chalmar Zai' hi MDM library lamah dahlut tawhin nizan lamah khan Zonet-ah tihchhuah a ni tawh a, YouTube lamah pawh a awm thuai ang.

'A rem si lo' tih hla thiam taka lo sa tawhtu Diktawn Exclusive star Tea Bawitlung chuan music video thar 'Thlawi Nunnemi' a tichhuak dawn.

'Thlawi Nunnemi' hi LV Chawngthu phuah a ni a, Video chu Peter video production kut chhuak a ni a, recording chu Melody records-a a tih niin music chu Opa'n a siam sak a ni.

He hla phuahtu LV Chawngthu hian an nau pakhat nuthlawi ngaizawngin a nu leh pa te hnena nupuia neih a dilna phuah sak tura a ngen anga a phuah sak a ni. 

Richard Chawngthu chuan hla thar 'Sirah min hnawl maw' tih a tichhuak dawn.

'Sirah min hnawl maw' hi Dina Jathang phuah a ni a, Richard-a music video palina tur niin Richard-a hian a hla hmasa pahnih 'I Liam si maw' leh 'Beiseinain' tih phei chu Zonet Ṭhazual chart-ah pawh a lo invawrh pui tawh hle a ni.

Tuna a hla thar tihchhuah tur hi thla thum vel lai a buaipui hnuah a tichhuak dawn a, Music & Recording chu Westend Studio kut chhuak niin, Videography erawh Moonshine Studio kut chhuak a ni thung.

MDM library lamah nimin khan dahlut fel tawhin Zonet lamah kan hmu thuai dawn a ni.