Oscar 2015 Entu tlem kum

Kum 2009 hnu lama Oscar Awards entu chhiat ber, tlem ber ṭum chu tun Oscars kha a ni a, entu an tlem chhanah hian host Neil Patrick chu an mawhpuh deuh ber.

Pathianni zana Oscars an sem khan entu maktaduai 36.6 a nei a, hei hi kum 2009 hnua entu an tlem ber ṭum a ni. Nikum nena khaikhinin, entu 16% zetin an tlem zawk a, nikum khan 12 Years of Slave chu Best Picture-a thlan a ni a, Ellen Degeneres chuan a host thung. Nikuma entu kha maktaduai 43.7 zet an ni.

Kum 2009 khan entu an tlem khawp a, maktaduai 36.3 chauhin an en a, hemi ṭum hian Hugh Jackman, Wolverine lema chang khan a host a ni. Hemi ṭuma hit em em chu Slumdog Millionaire kha a ni.

Social media lamah pawh kumin Oscars hi a tlahniam nasa hle a, nikum aiin Oscar chungchang tweet hi 60% zetin a tlem zawk! Kum 2014 khan Twitter-a Oscar thu an tweet hi maktaduai 11.2 lai a nih laiin kumin chuan maktaduai 5.9 chauh a ni.

Entu an tlem ti mah se, Oscars hi chu khawvelin a ngaihlu a, awards dangte nena khaikhinin entu an la tam zawk hle. Grammy kha mi maktaduai 25.3 in an en a, Golden Globes kha mi maktaduai 19.3 in an en.

Host Neil Patrick hian mipui a hip tawk lo niin an ngai a, show chhungah chuan a che ṭha viau nachungin boruak a siam thiam tawk lo nia ngaih a ni.

Emma Stone hian Oscar-ah khan engmah chan a nei lo. Lego hmanga siam a statue erawh a hlut hle. Oscar sem zan khan a chanpual ve ber chu midang hlawhtlinhte thinlung taka lo lawmpui leh hnukulh ṭeuh an hlimna lo thlir kha a ni