Generation Z zingah broadcast TV en ṭhin an tlem

Ofcom-in annual report a tih chhuahah, UK-a Generation Z-te zingah TV aṭanga live leh programme enchhin chu 48% vel chauh an awm. Tradition TV an en zat hi nikum aiin 16% in a tlem tawh zawk.

Gen Z huam chin hi sawi dan a in ang chiah lo a, kum 1997-2012 inkara piangte hi sawi dan tlangpui a nih laiin, ṭhenkhat chuan 1995 -2010 emaw 1999-2015 inkara piangte an huamtir thung.

Zirchianna aṭang hian chawhrualin Gen Z hian ni khatah TV enna atan hian minute 33 vel chauh an hmang a, hetih lai hian video-sharing platform, TikTok, YouTube leh dangte enna atan ni khatah darkar khat leh minute 33 an hmang thung.

Kum 5-15 inkar zingah tradition TV en ṭhin hi 55% vel an awm a, kum 2018 kha chuan 81% an la awm a ni. Hetih lai hian kum 45-54 inkarah pawh TV en hi an tlahniam a, nikuma 89% an awm laiin, kuminah chuan 84% an ni a, kum 65 chunglamah pawh viewer hi 5% in a tlahniam bawk.