Lersia Play : July thlaah 'Thih Thlengin Aw' leitu an tam ber

Mizo movie streaming app, Lersia Play-a July, 2024 chhunga film hralh chhuah nasat ber chu 'Thih Thlengin Aw' a ni.

'Thih thlengin aw' hi July 6, 2024-a tlangzarh a ni a, pyschological horror movie niin, OBG Production kut chhuak a ni. He film hi a taka tawngtute thil tawn behchhana siam a ni a, an buaipui chhung pawh a rei hle. Director hi Kima Renthlei (OBG Production) a ni a, Vanlalawmpuia (Opix Renthlei) chu scripwriter niin, PC Lallawmzuali chu co-writer a nih bakah movie-ah hian a chang ve bawk. Mizo actor kan neih ṭhat, Papuia Pachuau chu a changtupa a ni bawk a, anni bakah Zuali Chahngte leh Mary Kim te pawh an chang bawk. Nupa hlim tak anga lang, Sangtea leh Christy te nupa inkar, thil felhlel awm avanga inhriatthiam lohna an neih chhoh leh, an inkarah hian thil inthup rapthlak a awm em tih an chhuina chungchang a ni.

July thlaah hian action/thriller 'Kat leh Daifim' chu leitu ngah ber dawttu a ni, he film hi June 28-a tlangzarh a ni thung. Lalbiakzama, MPS (Retd) ziah leh direct niin, thil thleng tak tak behchhana a siam a ni ve bawk. Jeremy Lalngilneia chu director of photography niin, a changtute hi Lianpuia, Mary Kimkimi, Rohlua Sailo, Hlui Sailo, Maawma Ngente, Rinmawia leh LBA te an ni.

In-House Production kut chhuak, May 11-a tih chhuah ni tawh, 'Kan Chhungkua' chu July thlaa film hralh chhuah tam pathumna a la ni pha. IN-House Production hian Mizo film industry lamah a thawh hlawk hle a, feature film pawh an ti chhuak nual tawh a ni. Director hi Drew Pachuau niin, Tommy, Oliva Pachuau, Maruata leh Maawma te an chang. Script hi Samuel Pachuau ziah a ni bawk.

Lersia Play-in July thla chhunga film a hralh chhuah tam zual panga zingah hian May 9-a chhuak, Fanai Pictures kut chhuak 'Zu Zuar Fanu' bakah, Leitlang Pictures-in kum 2021-a a lo siam tawh, 'Norah' chu a rawn lang ve leh bawk a ni.