Olympic Women 100m Final en duh vangin Adele-in a concert lai a titawp lawk

British singer/songwriter, Adele chuan August 3, 2024 (Inrinni)-a Munich-a a concert chu 2024 Paris Olympic Women's 100m Final en duh vangin a titawp lawk a, big screen-ah hmeichhe intlansiak lai chu a concert chhimtute nen an enho. He intlansiakah hian Julien Alfred chu pakhatna niin, Saint Lucia ram tana gold medal hmasa ber a la a ni.

Adele hian Munich residency hi Zirtawpni liam ta aṭang khan ṭan in, August 31 thleng a nei dawn a, kar khatah show vawi hnih a nei ṭhin ang. Germany dawtah US lamah kir lehin, October 25 - November 23 chhungin "Weekends with Adele" Las Vegas residency a nei leh dawn bawk. Residency a zawh hnu hian music lam aṭanga chawlh lak rih a tum thu a lo puang tawh a ni.