Band leh hming hriatsual
Tunhma pawh a ni chuang lo, tunlai thleng hian zaithiam leh band hming, lamtawi anga ngaih tam tak a awm a, chung lampum chu mak tak taka sawi chhuah a ni
ṭhin. A ṭhen chu Setana pawla kaihluh phet tuma vuahte pawh a ni hialin a hriat a, mahse anmahni an kawmnaa an sawi chhuahah chuan miin thil ropui leh rapthlak tak tak an kawhtir ang ni loin, a lo chhuahna leh a lam pum a pangngai hle si.
New York rapper lar DMX hi a hming lampum leh awmziaah mi tam tak an inhnial a, 'Dark Man X' tihna a ni te an ti ṭhin. Mahse amah DMX chuan MTV-ah DMX digital drum machine aṭangin a emcee name hi a phuah tih a sawi. A hming tak hi Earl Simmons a ni.
AC/DC hi hman deuh khan Mizoramah pawh an hming lampum nia sawi, turu buru zet mai kha a lar hle ṭhin a, chu chu 'Anti Christ/ Devil's Child' tihna a ni an ti ṭhin. Mahse he band dintu, Malcolm leh Angus Young te unau chuan 'Alternating Current/ Direct Current' tihna a ni tih an sawi a, Malcolm chuan puanṭhui khawla AC/DC tih inziak aṭanga a phuah a ni a ti.
W.A.S.P. lampum nia an sawi ṭhin hi chi hrang hrang a awm a, a bon hlawm hle! Mahse miin bon deuh deuha an chhuah ang aiin a ho thung si a ni. Los Angeles chhuak glam metal band hlawhtling ṭhin hming lampum hi a ṭhen chuan 'We are Satan's preachers' tihna a ni e, an ti a, a ṭhen chuan 'We all smoke pot' tih a ni zawk an ti a, Mizoram thlenga rawn lar ve ṭhin chu 'We are sexual perverts' tih a ni. Mahse a tak takah chuan a ni teuh si lo. Rock music lam ziakna chanchinbu, TheWeeklings-a Joe Daly-a'n a kawmnaah chuan an singer Blackie Lawless-a'n khuai chi khat, wasp a hmu a, chumi
aṭang chuan a phuah a ni. A kara chhut han an dahna chhan chu mi an inhnial luih luih nana a tih a ni a, a tum a hlawhtling hle ta a ni.
KISS pawh hi Mizo tam takten an sawi ṭhin leh, an lar hunlaia miin a lampum an vuahsak ṭhin chu 'Knights in Satan's Service' tih a ni ṭhin, mahse a lo ni lo tawp mai. The Chive-in a tarlan dan chuan he band dintute zinga mi, Paul Stanley chuan an drummer Peter Criss hi a hmain band pakhat 'Lips'-ah a tel
ṭhin a, band an han din chhoh khan Lips aṭang chuan Kiss tiin hming an phuah ta niin a sawi.