Chhantea hla tharah BEISEINA a awm

Heroin (No. 4) ngawlveite tan an ngawlveina aṭanga chhuah a harsa bik hle ṭhin. A suffer lai bawr hi a hrehawm a, mi tam tak chuan nghei theih an inring tawh lo a, hrehawm ti tak si, nghei duh si, thei si loin an awm ṭhin. An nun a beidawng a, thih mai an thlang fo a ni. Heng mite tan hian Chhantea hla thar Beiseina hi beiseina petu a ni ngei ang.

H. Lalchhanchhuaha hla thar 'Beiseina OST' hi heroin ngawlvei tawhten beiseina an neih a, an tan hun ṭha a inhawng a ni tih an hriat theih nana siam a ni a, OST Centre, Civil Hospital Aizawl MSACS tena an produce a ni.

OST tih chuan original soundtrack tihnaah i ngai mai thei, a ni hauh si lo! Heroin ngawlveite an enkawlna hming a ni a, a lampum chu Oral/ Opioid Substitution Therapy tihna daih a ni. He inenkawlna hmang hian tunlaiin, he≠roin mai bakah ruihhlo, a ngawlvei nghet em em - morphine, codeine, oxycodone leh a dangte tel loa nun hmang thei tawh lo nia inhriate enkawl nana hman a ni.

Chhantea hla thar Beiseina OST pawh hi heroin avanga harsatna tawk mekten nun thar an lo neih aṭanga phuah chhuah a ni. OST Centre, Civil Hospital Aizawl MSACS-a thawkten nun, beidawng tak tak, beiseina reng reng nei tawh loa damlai nun hmang te, dam aia thih mai thlang zawk ten OST an lak
aṭanga beiseina thar nen nun bul
ṭan ṭhain, hmasawnna nen hmalam an pan ve zel a ni tih an hmuhin PB Lalbiakzuala (Zeta Tlau), Armed Veng chu hla an phuahtir a, Chhantea an saktir a ni.

He hla phuahtirtu te, phuahtu leh satute chuan tuna ṭhalai, ruihhlo bawiha tang mek, kal ngaihna hre loa beidawngte tan beiseina thar siamtu a nih theih nen he hla hi an buatsaih a, an peih a, MDM library-ah an dah lut. A hla thuah hian heroin addict-in OST kaltlang≠a enkawlna a dawn hnua damna a chan thu tarlan a ni.

Delhi-a heroin addict, Jameer tia a hming an tarlan, kum 40 mi chuan OST aṭanga hlawkna a chhar thu a sawi a, ani hi MMT Clinic-a enkawl a ni. "Kum 18 chhung zet chu heroin hi ka lo khawih ve tawh a, ka nupui nena kan innghir≠nghona bul a ni. Hei bakah hian ka ruihhlo tih avangin thil sual tam tak ka ti a, vawi eng emaw zat jail-ah ka tang tawh bawk. Hna ka nei thei lo a, ka beidawng hle tawh a, chumi hnuah chuan MMT clinic-ah ka inenkawl a, tunah chuan ka nun a inthlak danglam ta. Ruihhlo ka ti tawh lo a, hna ka nei tawh a, ka nun pawh nuam takin ka hmang ve thei tawh a ni," a ti.

Beiseina OST music hi Kima Chhangte siam a ni a, Blue Wave-ah record a ni. Reiloteah TV lamah pawh kan hmu thuai ang.