Fifty Shades of Grey ziaktuin a hlawh hnem

Fifty Shades of Grey hi a lehkhabu mai bakah a movie-in a hlawhtling hle a, hei vang hian a ziak≠tu pawhin sum a lakluh hnem phah hle.

Fifty Shades of Grey lehkhabu ziaktu hi EL James a ni a, he lehkhabu a ziah aṭang hian USD mtd 69 zet chu a hlawh der mai. Daily Mirror, British chanchinbuin a tarlan dan chuan Fifty Shades Limited hian nikum chhung khan lehkhabu hralhna aṭang ringawt≠in £mtd 30 zet a thawk chhuak thei a ni.

Film-a siam a nih bawk kha. Dakota Johnson leh Jamie Dornan te an chang a, tunah hian a chhunzawmna, Fifty Shades Darker chu siam leh mek a ni a, kum 2017-a tihchhuah a ni ang a, hemi bakah hian Fifty Shades Freed a la awm leh bawk.

Daily Mirror-in a tarlan dan chuan he lehkhabu ziaktu, EL James, a hming tak Erika Mit≠chell hian film-a siam tura inremsiamna a neihpui
aṭanga a sum hmuh ri≠ngawt hi USD mtd 6.4 (£mtd 4.8) a ni. James hian nikum September thla tawp thlenga a sum hmuh ṭhenkhat a tarlang. Chhiaha USD mtd 6.6 (£mtd 5) a pek hnu leh, ṭanpuina thila £mtd 1 a pek hnuah £mtd19 lai a la hlep thei cheu. Tun thlenga Fifty Shades of Grey aṭanga a sum hmuh tawh zawng zawng hi USD mtd 69 (£mtd 52) zet a ni tawh.

James hi kum 53 mi a ni a, a pasal hi TV drama leh comedy chan tur ziak≠tu, screenwriter Niall Leonard niin, fapa pa≠hnih an nei tawh a, West London-ah chengin, an in hi £mtd 2.65 (USD mtd 3.5) man vel a ni.

Fifty Shades of Grey lehkhabu hi Fifty Shades trilogy-a a bu hmasa ber a ni a, kum 2011-a lehkhabua tihchhuah kha a ni. June 2015 thleng khan he lehkhabu, Fifty Shades of Grey hi khawvel pumah copy maktaduai 125 zet an hralh tawh. Lehkhabu pahnihna hi Fifty Shades Darker a ni a, a bu thumna hi Fifty Shades Freed a ni. Nikum June thla khan trilogy zinga tel ve chiah lo, Grey: Fifty Shades of Grey as Told by Christian lehkhabu tihchhuah a ni a, he lehkhabu hi a changtupa, Christian Grey-a thlirna tlang ang aṭanga ziak a ni.