Harrison Ford A channain sum a hailut hnem ber
Film star hlawhtling leh hlawhtling lo tehna pakhat chu an channa film ten sum an hailuh hnem leh hnem lohah a ni. Chutiang aṭanga tehah chuan Harrison Ford hi a hlawhtling ber.
Harrison Ford-a'n movie a chan tawh zawng zawng aṭanga a channa movie ten sum an lakluh tawh zat hi USD tld 4.871 a ni. Indiana Jones kha a hlawhtlinpui mai bakah, kum≠ina chhuak Star Wars: The Force Awakens kha ropui takin box office hrang hrang a che a nih kha.
Harrison Ford hian movie pangngai 41 a chang tawh a, chawhrualin movie a channa pakhatah hian USD mtd 118.8 hmu tling ziah ang a ni. Harrison Ford-a chan tawhna zingah chuan Star Wars: The Force Awakens hian sum a thawk chhuak hnem ber a, USD mtd 936 zet a hmu tling. A dawtah chuan kum 1977-a a chan, Star Wars tih kha a ni a, USD mtd 460 zet a hmu a, pathumna chu kum 2008-a mi, Indiana Jones: The Kingdom of Crystal Skull kha a ni a, USD mtd 317 a lalut.
Pahnihna chu Samuel L. Jackson a ni. He African-American hi movie khawvelah chuan a hlawhtling berte zinga mi a ni. A movie chan tawh zawng zawngtena sum an lakluh tawh zat chu USD tld 4.646 a ni a, a hma chuan actor zingah, movie chan tawhna sum lakluh zawng zawnga tam ber a ni ṭhin a, Harrison Ford hian Star Wars: The Force Awakens hmangin a rawn khum ta a ni. A channa kan hriat lansarh hnuhnung ber chu The Avengers kha a ni. Mojo-in Highest Grossing of All Time list a tihchhuaha a chung lam mi 50 zingah Jackson hian movie a chang hnem ber tawh a, movie 68 a chang tawh a ni.
Pathumnaah hian African-American bawk a awm a, chu chu Morgan Freeman a ni. A movie channa ten sum an hmuh chhuah tawh zawng zawng chu USD tld 4.433 zet a ni tawh. The Dark Knight kha a hlawhtlinna lian berte zinga mi a ni.
Highest grossing of all time-a top 10 zingah hian hmeichhia pakhat chauh a lang ve a, chu chu Scarlett Johansson a ni. Scarlett film chan tawh 37 tena sum an lakluh zawng zawng chu USD tld 3.332 a ni a, The Avengers kha a hlawhtlinpui hle nghe nghe a nih kha. Ani dawta hmeichhe lang leh chu Cameron Diaz niin 19-naah a lang. A channa ten sum an thawh chhuah tawh zat hi USD tld 3.031 a ni.
Actor hlawhtlingte
Changtu Hmuh zat Film zat
1 Harrison Ford USD tld 4.87 41
2 Samuel L. Jackson USD tld 4.646 68
3 Morgan Freeman USD tld 4.433 60
4 Tom Hanks USD tld 4.340 44
5 Robert Downey, Jr. USD tld 3.943 53
6 Eddie Murphy USD tld 3.810 38
7 Tom Cruise USD tld 3.587 36
8 Johnny Depp USD tld 3.366 45
9 Michael Caine USD tld 3.340 58
10 Scarlett Johansson USD tld 3.332 37