India-in Surface-To-Air Missile hlawhtling takin a enchhin

India chuan chuan nimin khan Israel puihnain lei aṭanga boruak lama kah chhoh chi, surface to air missile enchhinna Odisha tuipuiah hlawhtling takin a nei.

Tuna a enchhin tak hi Medium range missile (MR-SAM) niin India leh Israel te hian hun rei tak an lo buaipui tawh a, Chandipur-a Integrated Test Range (ITR) aṭangin zing dar 8.15 khan hlawhtling takin a kap chhuak a, an tum tak a fuh tih Defence Research and Development Organization (DRDO) official chuan a sawi. He missile hi Multi Functional Surveillance leh Threat Alert Radar (MF STAR)-a thuam a nih thu Defence Research & Development Organisation (DRDO)-a scientist te chuan an sawi.

Indian Defence Research Development Laboratory (DRDL) leh Israel Aerospace Industries (IAI) te chuan Hyderabad-ah he missile siam hna hi an thawk a ni. Kumin chhungin surface-to-air missiles, thui tak kap pha (long range) leh a thui lam laihawl kap pha (medium range) tam zawk siam chhuak turin M/s Bharat Dynamics Limited chuan hma a la mek bawk. Missile enchhinna hi Nilainia neih tura tih kha a ni a, nimin zing khan kah chhuah a ni ta zawk a ni. He mi hma hian Indian Navy te chuan December 30, 2015 khan Western Seaboard INS Kolkata-ah long range surface-to-air missile (LR-SAM) hlawhtling takin an lo enchhin tawh bawk.

Nimina a kahchhuah, hlawhtling taka a enchhin surface-to-air missiles (SR-SAM) hian boruakah km 50-70 a kap phak a ni. Enchhin a nih dawn hian, fimkhur thilah Balasore district administration chuan a bul hnaia cheng mi 3652 vel te chu hmun hima awm turin an hriattir a ni. Sangha mantu Balasore, Bhadrakh leh Kendrapada district-a mite chu chhuak lo tura hriattir an ni bawk.