Khiangte Construction Ṭhazual Gospel: Christina 'Fapa sawm aia hlu' a hlu

Mizo gospel band lar, 'One in Christ' member, Christina Vanlalnghaki chuan a single 'Fapa sawm aia hlu' chu Khiangte Construction Ṭhazual Gospel chart-ah hmahruaitu a rawn nihpui.

'Fapa sawm aia hlu' phuahtu hi Lalzuimawii Tlau a ni a, he hla hi Bible-a I Samuael 1 : 1-8 thu, Hani'n fa a neih loh avanga hrehawm a tih leh, deusawh a tawh vanga a ṭah laia a pasal, Elkana'n 'Fapa sawm aiin ka ṭha zawk lawm ni?' tia a ṭah chhan aia a hlut zawk thu sawia a lo hnem chungchang behchhana siam a ni. Kan neih loh leh kan thil awh aia ṭha Lal Isua kan nei reng a ni tih hriat tharna turin he hla ropui tak hi a rawn phuah chhuak a ni. A thluk hi Tea (VL.Pachuau) siam niin, music hi Muanpuia siam a ni. Studio A-16-ah recording hi tiin, music video hi Moonshine Studio kut chhuak a ni thung. Christina zai thiam zia kan hria a, thiam leh nung tak maiin a rawn sa chhuak a, mi tam tak nun hrehawm chhawktu hla ṭha, mawi leh hlu tak a ni.

Seraphic Choir hla, 'Jerusalem' chu chart hmasaa parukna aṭangin pahnihnaah a rawn chho a, he hla Mizo ṭawnga lettu hi Lalṭanpuia a ni, an thiamin ngaihthlak a nuam leh hle. Chart-ah hian an hla dang, 'Chawimawina leh lawmna' tih chu an lanpui thei bawk a ni. Divine Voice chuan anmahni hla phuah 'Malsawm ang che' tih pawh pathumnaah an rawn lanpui. Zorinsanga Sailo 'Min hruai turin ka thlang ber che' leh Hlimhlimi 'Ropui ber kan fak a che' tih chu Top 5-ah an lang bawk.

Ṭhazual Gospel Top 10-ah hian Ngurthangvela leh Malawmi te kan la hmuh chhunzawm a, hetih lai hian Nancy Zothanmawii leh Ablaze an rawn lang thar ve bawk a ni.